İoan 21 - Enі Baalantı

İisus Tiveriada gölündä

¹ Bundan sora İisus enidän gösterildi Kendi üürenicilerinä Tiveriada gölünün boyunda. Tä nicä O göründü:

² Simon Petri, Foma, angısına dener «İkiz», Nafanail, Galileyanın Kana küüyündän, Zevedeyin oolları hem taa iki üürenici toplandıydılar bireri.

³ Simon Petri dedi: «Giderim balık tutmaa». Onnar cuvap ettilär: «Gideriz biz dä seninnän». Gittilär da pindilär kayık içinä, ama o gecä bişey tutmadılar.

⁴ Açan aydınnandı, İisus durardı gölün boyunda, ama üürenicilär tanımadılar Onu.

⁵ İisus dedi onnara: «Uşaklarım! Tuttunuz mu bişey sabaa imeesi için?» Onnar cuvap ettilär: «Tutmadık».

⁶ O dedi onnara: «Atın süzmeyi kayıın saa tarafına da tutacenız». Onnar attılar da artık çıkaramardılar süzmeyi, okadar çok balık tutulmuştu.

⁷ Ozaman üürenici, angısını sevärdi İisus, dedi Petriyä: «Tä, Saabi!» Simon Petri, açan işitti, ani O – Saabi, belinä baaladı üst rubasını, zerä soyunmuştu, da atladı su içinä.

⁸ Ama kalan üürenicilär geldilär kayıklan, zerä uzak diildilär kenardan, yakın bir ikiüz endezenin dolayında, da çekärdilär süzmeyi balıklarlan.

⁹ Açan çıktılar kuruya, orada gördülär koor üstündä koyulu balık hem yanında ekmek.

¹⁰ İisus dedi onnara: «Verin balıklardan, ani şindi tuttunuz».

¹¹ Simon Petri pindi kayaa da çekti süzmeyi kenara. O doluydu büük balıklarlan, hepsi vardı üz elli üç balık. Bakmayarak, ani ölä çok, süzmä hep okadar kopmadı.

¹² İisus dedi onnara: «Gelin da iyin». Kimsey üürenicilerdän kıyışmardı sorsun Ona: «Kimsin sän?» Zerä hepsi tanıyardılar, ani O Kendisi Saabi.

¹³ İisus yaklaştı, aldı ekmää da verdi onnara. Hep ölä sora verdi balıkları da.

¹⁴ Bu üçüncü sıra İisus gösterildi üürenicilerinä dirilmektän sora.

Petri, otlat Benim koyunnarımı

¹⁵ Onnar idiktän sora, İisus dedi Simon Petriyä: «Simon, İoanın oolu! Seversin mi sän Beni taa çok bunnardan?» Petri cuvap etti: «Aslı, Saabi, Sän bilersin, ani bän severim Seni». İisus dedi ona: «Otlat Benim kuzularımı».

¹⁶ İkinci sıra sorêr ona: «Simon, İoanın oolu! Seversin mi sän Beni?» Petri cuvap etti Ona: «Aslı, Saabi, Sän bilersin, ani bän severim Seni». İisus dedi ona: «Güt Benim koyunnarımı».

¹⁷ Üçüncü sıra sordu ona: «Simon, İoanın oolu! Seversin mi sän Beni?» Petri güçlendi, ani üçüncü sıra hep bunu sordu: «Seversin mi Beni?» da cuvap etti: «Saabi! Sän hepsini bilersin. Sän bilersin, ani bän severim Seni». İisus dedi ona: «Otlat Benim koyunnarımı.

¹⁸ Dooru, dooru söleerim sana, açan sän gençtin, kuşanardın kendin da gidärdin, nereyi kendin istärdin, ama açan ihtärlayacan, uzadacan ellerini, da başkası kuşayacek seni da götürecek, nereyi sän hiç istämeersin».

¹⁹ Söledi bunnarı, ki göstersin, nesoy ölümnän Petri metinneyecek Allahı. Bunnarı sölediktän sora dedi ona: «Gel Benim ardıma».

²⁰ Petri baktı geeri da gördü, ani onnarın ardına geler üürenici, angısını sevärdi İisus, hem angısı avşam ekmää vakıdında dayandıydı İisusun güüsünä, da sordu: «Saabi! Kim satacek Seni?»

²¹ Petri, görüp onu, sordu İisusa: «Saabi, onunnan ne olacek?»

²² İisus dedi: «Eer Bän istärseydim, ki o kalsın diri, taa Bän gelincä, sana ne zarar? Sän bak da gel ardıma».

²³ Bundan sora laf daaldı kardaşların arasında, ani bu üürenici hiç ölmeyecek. Ama İisus demedi, ani o hiç ölmeyecek, salt dedi: «Eer Bän istärseydim, ki o kalsın diri, taa Bän gelincä, sana ne zarar?»

²⁴ Bu, o üürenici, ani şaatlık eder bu işlär için hem yazdı bunnarı, da biz bileriz, ani onun şaatlıı aslı.

²⁵ Var çok taa, ne yaptı İisus, ama eer yazılaydı hepsi ufacıktan, sanêrım, ki bütün dünnä yoktu nasıl sıydırsın bu yazılmış kiyatları. /Amin./