İoan 2 - Enі Baalantı

Kana küüyündä düün

¹ Üçüncü günü Galileyanın Kana küüyündä düün vardı. İisusun anası oradaydı.

² Düünä çaardılar İisusu da üürenicilerinnän.

³ Çünkü şarap bitmişti, İisusun anası dedi Ona: «Onnarda yok şarap».

⁴ İisus cuvap etti: «O, karı! Bana hem sana ne? Benim saadım taa gelmedi».

⁵ Anası izmetkerlerä dedi: «Yapasınız onu, ne deyecek».

⁶ Orada vardı altı kap taştan. İudeylerin adetlerinä görä, bu kaplardan suyu faydalardılar yıkanmak adetlerindä. Herkezi bu kaplardan alardı iki-üç ölçü su.

⁷ İisus dedi onnara: «Doldurun kapları suylan». Onnar doldurdular onnarı aazlarınadan.

⁸ «Şindi alın da götürün düün cuvapçısına», – dedi İisus. Ölä dä yaptılar.

⁹ Düün cuvapçısı dattı sudan olmuş şarabı. O bilmärdi, neredän bu şarap, bilärdilär izmetkerlär, ani doldurdular kapları. Düün cuvapçısı çaardı güveeyi

¹⁰ da dedi ona: «İnsan ilkin koyêr sofraya ii şarabı, da konaklar sarfoş olduktan sora, prost şarabı. Ama sän ii şarabı brakmışın şindiyä kadar».

¹¹ İisus yaptı bu ilk nışanı Galileyanın Kana küüyündä. Bununnan açtı Kendi metinniini, da üürenicileri inandılar Ona.

¹² Ondan sora, anasınnan, kardaşlarınnan hem üürenicilerinnän barabar gitti Kapernauma. Orada kaldılar birkaç gün.

İisus paklêêr Ayoz binayı

¹³ İudeylerin Paskellesi yaklaşardı. İisus geldi İerusalim kasabasına.

¹⁴ Buldu Ayoz binanın aulunda öküz, koyun, guguş satannarı hem oturukça para diiştirenneri.

¹⁵ Tasmadan yaptı bir kamçı da kooladı hepsini dışarı Ayoz binanın aulundan koyunnarlan hem öküzlärlän, daattı para diiştirennerin gümüşlerini, aktardı masalarını.

¹⁶ Dedi guguş satannara: «Alın bunnarı buradan da Benim Bobamın evini panayıra çevirmeyin!»

¹⁷ Üürenicileri aklına getirdilär, ani var yazılı: «Havezlik Senin evin için Beni kemirer».

¹⁸ İudeylär bunun için dedilär Ona: «Ne nışannan bizä gösterecän, ani var dooruluun bunu yapasın?»

¹⁹ İisus dedi: «Yıkın bu Ayoz binayı da Bän üç günädän enidän kaldıracam».

²⁰ İudeylär dedilär: «Lääzım oldu kırk altı yıl yapılsın bu Ayoz bina, da Sän yapacan onu üç gündä mi?»

²¹ Ama O, deyeräk Ayoz bina, Kendi güüdesi için lafedärdi.

İisus biler hepsini

²² Açan dirildi ölüdän, üürenicileri aklına getirdilär, ani o sölediydi bu lafları, da inandılar Ayoz Yazıları hem İisusun sözünü.

²³ Açan İisus Paskellä yortusunda İerusalim kasabasındaydı, çok insan inandı Ona, zerä görärdilär meraklı nışannarı, ani yapardı.

²⁴ Ama Kendisi İisus umudunu onnara koymardı, zerä tanıyardı hepsini.

²⁵ Onun yoktu lääzımnıklıı, ki birkimsey annatsın insan için, zerä O Kendisi bilärdi, ne var insanın üreendä.