İoan 16 - Enі Baalantı

¹ Söledim hepsini bunnarı, ki siz sürçmeyäsiniz.

² Uuradaceklar sizi sinagogalardan. Gelecek artık ölä bir vakıt, açan herkez, kim sizi öldürecek, sanacek, ani bununnan Allaha izmet eder.

³ Bölä yapaceklar, zerä tanımadılar ne Bobayı, ne dä Beni.

⁴ Söledim bunnarı sizä, ki açan gelecek o vakıt, aklınıza getiräsiniz, ani Bän sizä söledyidim bunnarı. Baştan bunnarı sizä sölämedim, zerä sizinnän bilä bulunurdum.

Ayoz Duhun işi

⁵ Şindi giderim Ona, Kim Beni yolladı, ama sizdän biriniz bilä sormêêr: „Nereyi gidersin?“

⁶ Ama bu lafların beterinä, ani söledim sizä, kahır bastı sizi.

⁷ Ama Bän hakına söleerim sizä, ani taa islää olacek sizin için, ki Bän gideyim, zerä Bän gitmärseydim, İilendirici gelmeyecek, ama gidärseydim, yollayacam Onu sizä.

⁸ Açan O gelecek, dünneyä açacek, ne var günah, ne var dooruluk hem nedir Allahın daavası.

⁹ Açacek onnarın günahlarını, zerä inanmadılar Bana.

¹⁰ Açacek dooruluu, zerä Bän giderim Bobaya, da Beni şindän sora görmeyeceniz.

¹¹ Açacek daavayı, zerä daavaya kesildi bu dünneyin çorbacısı.

¹² Var çok işlär, söleyim sizä, ama şindi yok nasıl onnara dayanasınız.

¹³ Açan gelecek İilendirici, Aslılık Duhu, O doorudacek sizi bütün aslılaa, zerä O lafetmeyecek Kendindän, ama söleyecek, ne işidecek, hem bildirecek sizä gelär işleri.

¹⁴ O Beni metinneyecek, zerä alacek ondan, ne var Bendä, da sizä açacek.

¹⁵ Hepsi, ne var Bobada, onnar Benim, onuştan dedim, ani alacek ondan, ne var Bendä, da sizä açacek.

¹⁶ Bir parça vakıttan sora artık Beni görmeyeceniz, ama taa bir parça vakıttan sora enidän göreceniz, /zerä Bän Bobama giderim/».

Kahırınız sevinmeyä dönecek

¹⁷ Açan işittilär bu lafları, kimisi üürenicilerindän dedilär biri-birinä: «Ne isteer bizä demää bu laflarlan, ani bir parça vakıttan sora görmeyeceniz Beni, sora bir parça vakıttan sora enidän göreceniz, zerä Bän Bobama giderim».

¹⁸ Ölä ki, onnar sordular: «Nedir bu „bir parça vakıt“, ani O deer? Biz annamêêrız, ne lafeder».

¹⁹ İisus annadı, ani onnar isteerlär sorsunnar Ona, onuştan dedi: «Bunun için mi çekişersiniz, ani dedim: „Bir parça vakıttan sora görmeyeceniz Beni, ama taa bir parça vakıttan sora enidän göreceniz“?

²⁰ Dooru, dooru söleerim sizä, ani aalayacenız hem sızlayacenız, ama dünnä sevinecek. Siz kahırlanacenız, ama kahırınız sevinmeyä dönecek.

²¹ Karı, açan geler vakıdı duudurmaa, zeetlener, ama sora, açan duudurêr bir evlat, zeetlerini unudêr sevinmektän, ani bir insan duudu bu dünnedä.

²² Hep ölä siz dä şindi kahırlanêrsınız, ama açan enidän görecäm sizi, sevineceniz. Kimsey sizin sevinmenizi sizdän alamayacek.

²³ O gündä sormayacenız bişey Bana. Dooru, dooru söleerim sizä, ne dä isteyeceniz Benim adıma Bobadan, verecek sizä.

²⁴ Şindiyä kadar bişey istämediniz Benim adıma. İsteyiniz, da kabledeceniz, ki sizin sevinmeniz taman olsun.

Bän ensedim dünneyi

²⁵ Bunnarı annattım sizä örneklärlän, ama geler vakıt, açan artık örneklärlän lafetmeyecäm, ama açık lafedecäm sizinnän Boba için.

²⁶ O gündä isteyeceniz Benim adıma. Demeerim, ani Bän yalvaracam sizin için Bobaya.

²⁷ Boba Kendisi sizi sever, zerä siz sevdiniz Beni da inandınız, ani Allahtan çıkıp, geldim.

²⁸ Geldim Bobadan bu dünneyä, şindi brakêrım dünneyi da dönerim Bobaya».

²⁹ Üürenicileri dedilär: «Tä, şindi lafedersin açık da hiç lafetmeersin örneklän.

³⁰ Şindi annêêrız, ani bilersin hepsini, da diil lääzım, ki sorsun Sana birkimsey bişey, onuştan inanêrız, ani Allahtan geldin».

³¹ İisus cuvap etti: «Şindi inanêrsınız mı?

³² Tä, geler vakıt, artık geldi, açan daalışacenız herkeziniz kendi erinä. Beni yalnız brakacenız, ama Bän diilim yalnız, zerä Boba Benimnän.

³³ Söledim bunnarı, ki usluluunuz olsun Bendä. Bu dünnedä zeet geçireceniz, ama girginnenin, Bän ensedim dünneyi!»