İoan 12 - Enі Baalantı

Mariya yaalêêr İisusu

¹ Altı gün Paskelledän ileri İisus geldi Vifaniya küüyünä, neredä yaşardı Lazar, angısını diriltti ölüdän.

² Orada hazırlandı konuş Onun için. Marfa izmet edärdi, Lazar da onnardan birisiydi, kim İisuslan bilä sofradaydı.

³ Mariya aldı bir funt pek paalı yaa, temiz nard kokuluu, yaaladı İisusun ayaklarını da saçlarınnan silärdi. Bütün içersi doldu gözäl nard kokusundan.

⁴ Üürenicilerdän birisi, İuda İskariot, /Simonun oolu,/ angısı sora sattı İisusu, dedi:

⁵ «Neçin satılmadı bu yaa üçüz dinara, da para verilsin fukaaralara?»

⁶ Bölä lafetti, diil ani canı acıyardı fukaaralar için, ama ani hırsızdı. O tutardı keseyi da çalardı o gümüşlerdän, ani toplanardı.

⁷ İisus cuvap etti: «Gücendirmä karıyı, o bunu /lääzımdı/ korusun Benim gömülmäm için.

⁸ Fukaaralar herzaman sizinnän olaceklar, ama Bän herzaman olmayacam».

⁹ Çoyu iudeylerdän annadılar, ani İisus Vifaniya küüyündä, da geldilär orayı, diil sade İisusu görmää, ama Lazarı da, angısını ölüdän diriltti.

¹⁰ Büük popazlar neetlendilär, Lazarı da öldürsünnär.

¹¹ Zerä çoyu iudeylerdän, onun beterinä, gidip, İisusa inanardılar.

İisus girer İerusalimä

¹² İkinci günü bir sürü insan, ani geldiydilär yortuya, açan işittilär, ani İisus geler İerusalimä,

¹³ aldılar palma dalları da çıktılar İisusa karşı, baararak: «Osanna, iisözlenmiş olsun Allahın adına Gelän, İzrailin Padişahı!»

¹⁴ İisus buldu bir eşek, pindi ona atlı, nicä var yazılı:

¹⁵ «Korkma Sionun kızı, senin Padişahın sana gelecek atlı bir eşek koduu üstündä».

¹⁶ Üürenicilär baştan bunnarı annamadılar, ama ondan sora, açan İisus metinnendi, aklına getirdilär, ani bölä Onun için yazılı, da onuştan insan Ona bunu yaptı.

¹⁷ O insan, ani İisuslandı, açan O Lazarı diriltti ölüdän, şaatlık edärdi bunun için.

¹⁸ İnsan onuştan çıktı İisusa karşı, zerä işitti, ani yaptı bu nışanı.

¹⁹ Fariseylär lafedärdilär biri-birinnän: «Görersiniz mi, nicä bişey etiştirmeersiniz? Bak, bütün dünnä Onun ardına gider!»

İisus haberleer Kendi ölümü için

²⁰ Onnarın, kim geldiydi İerusalimdä baş iiltmää, vardı birkaç urum aralarında.

²¹ Onnar yaklaştılar Filipä, angısı Galileyanın Vifsaida kasabasındandı, da dedilär ona: «Çorbacı, isteeriz görelim İisusu».

²² Filip gitti da söledi Andreyä. Onnar ikisi geldilär da söledilär İisusa.

²³ İisus cuvap etti onnara: «Geldi saat, ki Adam Oolu metinnensin.

²⁴ Dooru, dooru söleerim sizä, ani booday toomu, ani, düşüp erä, ölmärseydi, yalnız kalêr. Ama ölärseydi, çok bereket getirer.

²⁵ Kim sever kendi canını, o kaybeder onu. Ama kim paa koymêêr kendi canına bu dünnedä, onu koruyup, diveç yaşamak edener.

²⁶ Eer birkimsey istärseydi izmet etmää Bana, gelsin ardıma. Neredä Bän olacam, orada olacek Benim izmetkerim dä. Eer birkimsey izmet edärseydi Bana, Boba ona saygı sürecek.

²⁷ Şindi Beni kahır bastı. Ne deyim Bän? Deyim: „Boba, kurtar Beni bu acı zamandan“? Ama Bän bunun için geldim!

²⁸ Boba, metinnä Sän Kendi adını!» Ozaman göktän işidildi bir ses, ani dedi: «Metinnedim hem metinneyecäm dä!»

²⁹ İnsannar, ani orada durardı, işittilär bu sesi da dedilär: «Gök gürüldedi!» Başkaları dedilär: «Bir angil Onunnan lafetti!»

³⁰ İisus cuvap etti: «Bu ses işidildi diil Benim için, ama sizin için.

³¹ Şindi daava olêr bu dünneyä, şindi bu dünneyin çorbacısı uuradıldı dışarı.

³² Açan kaldırılacam yukarı bu erdän, çekecäm hepsi insanı Kendimä.

³³ Bu laflarlan gösterdi, nesoy ölümnän lääzımdı ölsün».

³⁴ İnsan cuvap etti: «Biz işittik Zakondan, ani Hristos yaşayacek diveç. Nasıl var nicä deyäsin, ani Adam Oolu kaldırılacek, hem kim bu Adam Oolu?»

³⁵ İisus dedi onnara: «Aydınnık taa bir parça vakıt sizinnän olacek. Gezin, nekadar aydınnık sizinnän, sizi karannık kaplamasın deyni. Kim gezer karannıkta, bilmeer, nereyi gider.

³⁶ Nekadar vakıt aydınnık sizinnän, inanın aydınnıı, aydınnıın oolları olasınız deyni». İisus söledi bu lafları, sora gitti da saklandı onnardan.

İudeylerin inansızlıı

³⁷ İisus yaptı çok nışannar onnarın önündä, ama onnar hep okadar inanmardılar Ona,

³⁸ tamannansın deyni prorok İsayanın sözü, ani dedi: «Saabi, kim inandı bizim nasaatımızı? Kimä açıldı Allahın kuvedi?»

³⁹ Onuştan inanamadılar, zerä İsaya taa dedi:

⁴⁰ «Allah onnarın gözlerini köör etti, üreklerini çetinnetti, ki görmesinnär gözlerinnän, annamasınnar üreklerinnän da dönmesinnär Bana, ki alıştırayım onnarı».

⁴¹ İsaya söledi bu işleri, zerä gördü İisusun metinniini da lafetti Onun için.

⁴² Bakmayarak buna, çoyu artık zaabitlerdän da İisusa inandılar, ama fariseylär beterinä açık sölämedilär, ki uuratmasınnar onnarı sinagogadan.

⁴³ Zerä taa çok sevdilär insandan metinnii, nekadar Allahtan metinnii.

⁴⁴ İisus büük seslän dedi: «Kim inanêr Bana, o inanmêêr Bana, ama inanêr Ona, Kim Beni yolladı.

⁴⁵ Kim görer Beni, görer Onu, Kim Beni yolladı.

⁴⁶ Bän geldim olmaa aydınnık bu dünnedä, kim inanacek Bana, kalmasın karannıkta deyni.

⁴⁷ Eer birkimsey işidärseydi Benim sözlerimi da tamannamarsaydı, ona Bän daava kesmeerim, zerä Bän gelmedim daava kesmää dünneyä, ama kurtarmaa.

⁴⁸ Kim atılêr Bendän hem kabletmeer Benim sözlerimi, ona var kim daava kessin. O söz, ani söledim, daava kesecek ona bitki gündä.

⁴⁹ Neçinki Bän lafetmedim Bendän Kendimdän, ama Boba, ani yolladı Beni, Kendisi sımarladı, ne söleyim hem ne lafedeyim.

⁵⁰ Bilerim, ani Onun sımarlaması – diveç yaşamak. Onun için, ne lafederim, lafederim nicä Bana Boba sımarladı».