İoan 11 - Enі Baalantı

Lazar öler

¹ Vardı bir hasta adam, adı Lazar, Vifaniya küüyündän, neredändi Mariya hem kızkardaşı Marfa.

² Mariya o karıydı, ani yaaladı Saabiyi ii kokuluklan da sildi ayaklarını kendi saçlarınnan. Hasta Lazar Mariyanın kardaşıydı.

³ Bu kızkardaşlar yolladılar, sölesinnär İisusa: «Saabi, kimi Sän seversin, hastalandı».

⁴ İisus, açan işitti bu haberi, dedi: «Bu hastalık diil ölümä deyni, ama Allahın metinnii için oldu, ki bunun aşırı Allahın Oolu metinnensin».

⁵ İisus sevärdi Marfayı, onun kızkardaşını hem Lazarı.

⁶ Açan işitti, ani Lazar hasta, taa iki gün oyalandı orada, neredä bulunardı.

⁷ Sonda dedi üürenicilerinä: «Haydiyin, dönelim İudeya erlerinä!»

⁸ «Üüredici, şindi diil çoktan iudeylär Seni bakardılar öldürmää taşlan, Sän dä geeri dönersin orayı mı?» – dedi üürenicilär.

⁹ İisus cuvap etti: «Bir gündä diil mi oniki saat? Kim gezer gündüz, o sürçmeer, zerä görer bu dünneyin aydınnıını,

¹⁰ ama kim gezer gecä, o sürçer, zerä onda yok aydınnık».

¹¹ Bu laflardan sora dedi: «Lazar, bizim dostumuz, uyudu, ama Bän giderim, uykudan uyandırayım onu».

¹² Üürenicilär dedilär: «Saabi, eer uyuyarsaydı, alışacek».

¹³ İisus lafettiydi onun ölümü için, ama onnar sandılar, ani lafeder hakına uyku için.

¹⁴ Ozaman İisus açık söledi: «Lazar öldü.

¹⁵ Bän sevinerim, ani yoktum orada, ki inanasınız. Haydiyin, gidelim ona».

¹⁶ Ozaman Foma, angısına dener İkiz, dedi kalan üürenicilerä: «Haydiyin, gidelim biz dä Onunnan ölelim».

İisus iilendirer Lazarın kızkardaşlarını

¹⁷ Açan geldi İisus, annadı, ani Lazar dört gün şindän sora mezar içindä.

¹⁸ Vifaniya küüyü yakındı İerusalim kasabasına, uzaklıı bir onbeş stadi.

¹⁹ Çoyu iudeylerdän geldiydilär Marfaya hem Mariyaya, ki iilendirsinnär onnarı kardaşın ölümü için.

²⁰ Açan işitti Marfa, ani İisus geler, çıktı Ona karşı, ama Mariya kaldı içerdä.

²¹ Marfa dedi İisusa: «Saabi, eer Sän olaydın burada, ölmeyeceydi benim kardaşım!

²² Ama şindi bilerim, ani ne isteyecän Allahtan, O verecek Sana».

²³ İisus dedi: «Senin kardaşın dirilecek».

²⁴ Marfa dedi: «Bilerim, ani dirilecek bitki gündä, ölülerin dirilmesindä».

²⁵ İisus dedi: «Bänim dirilmäk hem yaşamak. Kim inanêr Bana, eer ölürseydi dä, hep okadar yaşayacek.

²⁶ Kim Bana yaşarkan inanêr, o hiç ölmeyecek. İnanêrsın mı sän bunu?»

²⁷ Marfa dedi Ona: «İnanêrım, Saabi, ani Sänsin Hristos, Allahın Oolu, Angısı lääzımdı gelsin bu dünneyä».

²⁸ Açan dedi bu lafları, gidip, saklı çaardı kızkardaşını da dedi: «Üüredici burada, O çaarêr seni».

²⁹ Mariya işittii gibi bunu, hızlı kalktı da çıktı İisusa karşı.

³⁰ İisus küü içinä taa girmediydi, O durardı hep orada, neredä karşı etti Onu Marfa.

³¹ İudeylär, ani içerdä bulunardılar Mariyaylan bilä da iilendirärdilär onu, görüp, ani o hızlı kalktı da çıktı dışarı, gittilär onun ardına. Sandılar, ani o gider mezara, aalamaa.

³² Mariya, açan etişti orayı, neredeydi İisus, görüp Onu, düştü Onun ayaklarına da dedi: «Saabi, eer Sän olaydın burada, ölmeyeceydi benim kardaşım».

³³ Açan İisus gördü onu aalarkan hem iudeyleri, ani geldilär onunnan, gücendi canında da kahırlandı.

³⁴ Sora sordu: «Neredä onu koydunuz?» «Saabi, – cuvap ettilär onnar, – gel da gör».

³⁵ İisus aalardı.

³⁶ Ozaman iudeylär dedilär: «Ya bak, O ne sevärdi onu!»

³⁷ Ama kimisi onnardan dedilär: «O, ani açtı köörların gözlerini, ne yoktu mu nicä yapsın, ki bu adam da ölmesin?»

Lazar diriler ölüdän

³⁸ Sora İisus, ölä kahırlı, geldi mezara. Mezar bir laamdı, aazına da bir taş koyuluydu.

³⁹ «Aktarın taşı bir tarafa», – dedi İisus. Marfa, ölünün kızkardaşı, dedi: «Saabi, o bet kokêr, zerä şindän sora dört gün, nicä öldü».

⁴⁰ İisus dedi: «Bän sana sölämedim mi, ani eer inanarsaydın, görecän Allahın metinniini?»

⁴¹ Aktardılar taşı /laam aazından, neredeydi ölü/. İisus, kaldırıp bakışını gökä, dedi: «Boba, şükür ederim, ani işittin Beni.

⁴² Bilerim, ani herzaman işidersin Beni, ama bunu deerim bu insan için, ani burada durêr, ki onnar inansınnar, ani Sän Beni yolladın».

⁴³ Bu laflardan sora baardı büük seslän: «Lazar, çık dışarı!»

⁴⁴ Ölü çıktı, elleri hem ayakları baalı bezlärlän, suratı da sarılı peşkirlän. İisus dedi: «Çözün onu, da gidäbilsin».

İisusa karşı neet

⁴⁵ Çoyu iudeylerdän, angıları geldiydilär Mariyaya, görüp ne yaptı İisus, inandılar Ona.

⁴⁶ Ama kimisi gittilär fariseylerä da söledilär, ne yaptı İisus.

⁴⁷ Ozaman büük popazlar hem fariseylär topladılar Sinedrionu da dedilär: «Ne yapalım? Bu Adam yapêr çok meraklı nışan.

⁴⁸ Eer brakarsak ölä Onu, hepsi Ona inanaceklar, gelecek romalılar da telef edeceklär hem bizim ayoz eri, hem milletimizi».

⁴⁹ Birisi onnardan, Kayafa, angısı o yıl baş popazdı, dedi: «Siz bişey bilmeersiniz.

⁵⁰ Annamêêrsınız, ani taa islää sizin için, bir adam ölsün hepsi insan için, nekadar hepsi insan kayıba kalsın?»

⁵¹ Bu lafı o sölämedi kendindän, ama çünkü o yıl baş popazdı, prorokluk etti, ani İisus lääzım ölsün hepsi iudey milleti için,

⁵² da diil sade bu millet için, ama toplasın bireri hepsi daalmış Allahın uşaklarını.

⁵³ O gündän sora neetlendilär, ki öldürsünnär Onu.

⁵⁴ Onun için İisus gezmärdi açıkta iudeylär arasında. Gitti oradan bir erä, ani yakın çola, bir kasabaya, adı Efraim, da orada kaldı üürenicilerinnän.

⁵⁵ İudeylerin Paskellä yortusu yaklaşardı. Çok insan dolaydan geldilär İerusalimä Paskelledän ileri, paklansınnar deyni.

⁵⁶ Onnar aarardılar İisusu da biri-birinä sorardılar Ayoz binada: «Ne deersiniz, hiç gelmeyecek mi O yortuya?»

⁵⁷ Ama büük popazlar hem fariseylär sımarladıydılar, ani kim annayacek, neredä İisus, haberlesin onnara, ki onnar tutsunnar Onu.