İoan 10 - Enі Baalantı

Güdücü hem sürü

¹ Dooru, dooru söleerim sizä, kim koyunnarın auluna girmeer kapudan, ama atlêêr başka erdän, o hırsız hem haydut.

² Kim girer kapudan, odur koyunnarın güdücüsü.

³ Kapuda duran açêr kapuyu, da koyunnar tanıyêrlar güdücünün sesini. O çaarêr herbir koyunu adınca da dışarı çıkarêr.

⁴ Açan çıkardı hepsi koyunnarını, sora gider onnarın önü sora, koyunnar da gelerlär onun ardına, zerä tanıyêrlar sesini.

⁵ Yabancının ardına gitmeerlär, ondan kaçêrlar, zerä tanımêêrlar yabancının sesini».

⁶ İisus söledi bu örnää onnara, ama onnar annamadılar, ne iş için o lafedärdi.

⁷ İisus enidän lafetti: «Dooru, dooru söleerim sizä, ani Bänim koyunnarın kapusu.

⁸ Hepsi, kim geldi Bendän öncä, onnar hırsız hem haydut. Koyunnar da onnarı seslämedilär.

⁹ Bänim kapu. Eer birkimsey girirseydi Benim aşırı, olacek kurtulmuş, girecek hem çıkacek da otlayacak kendinä bulacek.

¹⁰ Hırsız geler salt çalmaa, öldürmää hem yok etmää. Bän geldim, ki koyunnarın taşkınnıktan yaşamakları olsun.

¹¹ Bän – ii güdücüyüm. İi güdücü verer yaşamasını koyunnarı için.

¹² Ama yanaşık adam, kim diil güdücü, hem kim diil koyunnarın çorbacısı, açan görer yabanıyı gelärkän, brakêr koyunnarı da kaçêr, yabanı da, onnarı kapıp, daadêr.

¹³ O adam kaçêr, zerä o yanaşık, onun kasaveti yok koyunnar için.

¹⁴ Bän – ii güdücüyüm. Bän tanıyêrım koyunnarımı, onnar da tanıyêrlar Beni,

¹⁵ nicä Boba tanıyêr Beni, Bän dä tanıyêrım Bobayı. Bän vererim yaşamamı koyunnarım için.

¹⁶ Bendä var başka koyunnar da, ani diil bu auldan. Onnarı da lääzım getireyim. Onnar sesleyeceklär Benim sesimi. Ozaman olacek bir sürü hem bir güdücü.

¹⁷ Boba sever Beni, zerä Bän vererim yaşamamı, enidän geeri alayım deyni.

¹⁸ Kimsey onu zorlan almêêr Bendän, ama Bän Kendi istediimdän vererim. Var kuvedim vereyim hem var kuvedim geeri alayım. Bu sımarlamayı Bän kablettim Benim Bobamdan».

¹⁹ Bu laflardan sora enidän başladı kavga iudeylär arasında.

²⁰ Çoyu onnardan deyärdilär: «Onda var fena duh, O bir deli. Neçin sesleersiniz Onu?»

²¹ Başkaları deyärdilär: «Bu laflar diil fena duhlu adamın lafları. Var mı nasıl bir fena duh açsın köörların gözlerini?»

İisusa karşı duşmannık artêr

²² Ozaman oldu İerusalimdä yortu Ayoz binanın açılmasının anılması için. Kışındı.

²³ İisus gezinärdi Ayoz binanın aulunda, Solomonun kolonadasında.

²⁴ İudeylär Onu sardılar da dedilär: «Nezamanadan koyacan düşünmeyä bizi? Sölä açık bizä, Sänsin mi Hristos?»

²⁵ İisus cuvap etti: «Bän söledim sizä, ama siz inanmêêrsınız. O işleri, ani yapêrım Bobamın adına, onnar şaatlık ederlär Benim için.

²⁶ Ama siz inanmêêrsınız, zerä diilsiniz Benim koyunnarımdan, /nicä söledim sizä/.

²⁷ Benim koyunnarım sesleerlär Benim sesimi. Bän tanıyêrım onnarı, onnar da gelerlär Benim ardıma.

²⁸ Bän vererim onnara diveç yaşamak, onnar hiç bir vakıt kaybelmeyeceklär. Kimsey kapamayacek onnarı Benim elimdän.

²⁹ Benim Bobam, ani verdi onnarı Bana, O hepsindän taa büük. Kimsey yok nicä kapsın onnarı Benim Bobamın elindän.

³⁰ Bän hem Boba biriz».

³¹ İudeylär enidän taş aldılar, taşlan ursunnar Ona.

³² İisus dedi: «Çok ii işlär gösterdim sizä Bobamdan. Bu işlerin angısı için isteersiniz Beni taşlan düümää?»

³³ İudeylär cuvap ettilär: «Bakmêêrız bir ii iş için taşlan Seni düümää, ama Allahı kötülemäk için, zerä Sän adamsın, ama Kendini Allah yapêrsın».

³⁴ İisus dedi: «Diil mi yazılı sizin zakonunuzda: „Bän dedim: siz allahlarsınız“?

³⁵ Allah onnara dedi „allahlar“, kimä yolladı sözünü. Olmaz Ayoz Yazı bozulsun.

³⁶ Böleysä, Bän, Kimi Boba ayozladı da yolladı dünneyä, sizin lafınıza görä çıkêr, ani kötüleerim Allahı, salt onuştan, ani dedim: „Allahın Ooluyum“.

³⁷ Eer yapmarsaydım Benim Bobanın işlerini, ozaman inanmayın Beni.

³⁸ Ama yaparsaydım, ozaman, eer inanmarsaydınız da Beni, inanın baarlem işleri. Ozaman annayacenız hem bileceniz, ani Boba Bendä, Bän dä Onda».

³⁹ Onnar enidän baktılar tutsunnar Onu, ama O kurtuldu onnarın elindän.

⁴⁰ İisus enidän gitti İordanın öbür tarafına, neredä İoan öncä vaatiz edärdi, da kaldı orada.

⁴¹ Çoyu gelärdilär Ona da deyärdilär: «İoan yapmadı bir dä nışan, ama hepsi, ne söledi İoan bu adam için, aslı çıktı».

⁴² Çoyu inandılar Ona orada.