İoan 1 - Enі Baalantı

Söz adam oldu

¹ Baştan Söz vardı, Söz Allahtaydı, Söz Allahtı.

² Baştan O Allahtaydı.

³ Hepsi Onunnan kuruldu, Onsuz bişey kurulmadı.

⁴ Onda yaşamak vardı. Yaşamak insan için aydınnıktı.

⁵ Aydınnık karannıkta şafk eder, karannık onu enseyämedi.

⁶ Allahtan bir adam geldi, onun adı İoan.

⁷ Geldi Aydınnık için şaatlık etsin, hepsi insan onun aşırı inansın.

⁸ O Kendi diildi Aydınnık, ama geldi Aydınnık için sölesin.

⁹ Odur hakına Aydınnık, Angısı herbir adamı, bu dünneyä gelän, aydınnadêr.

¹⁰ O Kendi bu dünneyä geldi. Dünnä Onun aşırı yaradıldı, ama dünnä Onu tanımadı.

¹¹ Kendikilerinä geldi, kendikileri Onu kabletmedi.

¹² Ama hepsi onnar, kim Onu kabletti, kim Onun adına inandı, O izin verdi onnar olsun Allahın uşakları,

¹³ angıları diil kandan, diil ettän hem diil adam istediindän, ama Allahtan duudu.

¹⁴ Söz adam oldu, bizim aramızda yaşadı, iivergiylän hem aslılıklan dolu. Onun metinniini gördük, nicä Bobadan biricik Oolun metinniini.

¹⁵ İoan Onun için şaatlık etti da büük seslän bölä dedi: «Budur O, Kimin için haberledim: „O, Kim bendän sora geler, taa üstün bendän, zerä Bendän taa ileriydi“.

¹⁶ Onun doluşundan hepsimiz iivergi üstünä iivergi edendik».

¹⁷ Zerä Zakon Moisey aşırı verildi, ama hayır hem aslılık İisus Hristos aşırı geldi.

¹⁸ Allahı bir sıra bilä kimsey görmedi. Biricik Ool, Allah, kim Bobanın kucaanda bulunêr, O Allahı açtı.

Şaatlık Vaatizedici İoandan

¹⁹ Tä ne söledi İoan, açan İerusalimdän iudeylär yolladılar popazları hem leviylileri ona, sorsunnar: «Kimsin sän?»

²⁰ İoan açık söledi, atılmadı, bölä lafetti: «Bän diilim Hristos».

²¹ «E kimsin sän? İliyaysın mı?» – sordular onnar. «Diilim», – dedi o. «Beklenän proroksun mu?» «Diilim», – cuvap etti o.

²² «Ozaman kimsin sän, sölä bizä, ki bilelim, ne cuvap etmää onnara, kim bizi yolladı. Ne var nicä sän söleyäsin kendin için?» – sordu onnar.

²³ O dedi: «Bän – bir ses, çol erdä baaran: „Saabiyä yolu uzladın“, nicä prorok İsaya dedi».

²⁴ Ozaman yollanmışlar fariseylerdän Ona sordular:

²⁵ «Eer sän diilseydin ne Hristos, ne İliya, ne dä beklenän prorok, ozaman neçin vaatiz edersin?»

²⁶ İoan cuvap etti onnara: «Bän suylan vaatiz ederim, ama aranızda durêr Birisi, Angısını siz tanımêêrsınız.

²⁷ Odur, bendän sora gelän, /ama bendän üstün olan/. Bän diilim yakışıklı çözmää Onun ayak kaplarının tasmalarını».

²⁸ Bu oldu Vifavarada, İordanın ötäända, neredä İoan vaatiz edärdi.

Allahın Kuzusu

²⁹ Ertesi günü görer İoan İisusu, geleräk ona dooru, da deer: «Tä, Allahın Kuzusu, Angısı alêr dünneyin günahını!

³⁰ Budur O, Kimin için sizä haberledim, deyip: „Bendän sora geler Adam, ani taa üstün bendän, zerä bendän ileriydi“.

³¹ Bän Onu tanımardım, ama suylan vaatiz etmää geldim, ki İzrail insanına tanıdılsın».

³² İoan dedi: «Bän gördüm Ayoz Duhu, göktän guguş gibi ineräk da Onun üstünä konarak.

³³ Onu tanımardım, ama O, Kim yolladı, vaatiz edeyim, bana dedi: „Bak, kimin üstünä Ayoz Duh ineräk konacek, Odur, Kim Ayoz Duhlan vaatiz edecek“.

³⁴ Bän bunu kendim gördüm hem şaat oldum, ani Odur Allahın Oolu».

İisusun ilk üürenicileri

³⁵ Ertesi günü İoan üürenicilerindän ikisinnän bulunardı.

³⁶ İisusu oradan geçärkän gördü da dedi: «Tä, Allahın Kuzusu!»

³⁷ Üürenicilär, işidip lafları, ikisi dä İisusun ardına gittilär.

³⁸ İisus döndü da, görüp onnarı ardına gelirkän, dedi: «Ne aarêêrsınız?» Onnar dedilär Ona: «Ravvi (annaması Üüredici), neredä yaşêêrsın?»

³⁹ «Gelin da görün», – cuvap etti İisus. Onnar gittilär da gördülär neredä yaşêêr, da o günü Onunnan kaldılar. Yakındı onuncu saat.

⁴⁰ Birisi ikisindän, ani İoanın şaatlıını işitti da İisusun ardına gitti, Andrey, Simon Petrinin kardaşıydı.

⁴¹ O ilkin kendi kardaşını Simonu bulup, dedi ona: «Biz bulduk Messiyayı (annaması Hristos)».

⁴² Götürdü onu İisusa. İisus, açan gördü Simonu, dedi: «Sän – Simon, İoanın oolu. Senin adın olacek Kifa (annaması taş)».

Filip hem Nafanail geldilär İisusa

⁴³ Ertesi günü İisus istedi gitsin Galileyaya. O, bulup Filipi, dedi ona: «Gel Benim ardıma».

⁴⁴ Filip bulunardı Vifsaida kasabasında, neredän Andrey hem Petri.

⁴⁵ Filip buldu Nafanaili da dedi ona: «Biz bulduk Onu, Kimin için Moisey Zakonda hem proroklar yazdı, İisusu Nazaret kasabasından, İosifin Oolunu».

⁴⁶ Nafanail dedi ona: «Var mı nicä bişey islää çıksın Nazaret kasabasından?» «Sän gel dä gör», – cuvap etti Filip.

⁴⁷ İisus, görüp Nafanaili gelirkän, dedi onun için: «Tä, bu bir hakına İzrail adamı, angısında yok şalvirlik!»

⁴⁸ «Näändan bilersin?» – sordu Nafanail. İisus cuvap etti: «Gördüm seni, açan Filip taa çaarmadıydı, açan sän bulunurdun incir fidanın altında».

⁴⁹ Nafanail deer Ona: «Üüredici, Sänsin Allahın Oolu, Sänsin İzrailin Padişahı!»

⁵⁰ İisus cuvap etti: «Sän inandın, zerä dedim: „Gördüm seni incir fidanın altında“. Sän bundan taa büük işlär görecän».

⁵¹ Sora dedi: «Dooru, dooru söleerim sizä, ani büündän ötää göreceniz açılmış gökleri hem Allahın angillerini pineräk hem ineräk Adam Ooluna».