İakovun 4 - Enі Baalantı

Verilin Allaha

¹ Neredän sizdä düüşlär hem kavgalar? Diil mi sizin istemelerinizdän, ne sizin güüdelerinizin eklerindä cenkleşer?

² İsteyip, edenämeersiniz, onuştan öldürersiniz. Haseetlenersiniz, ama ne isteersiniz, etişämeersiniz. Kavga edersiniz hem düüşersiniz, ama edenämeersiniz, zerä Allahtan istämeersiniz.

³ İsteyip, kabletmeersiniz, zerä isteersiniz kötü neetlän, ki faydalanasınız salt kendi sefalıınız için.

⁴ Siz orospular! Bilmeersiniz mi, ani dünneylän dostluk – Allaha duşmannık! Ölä ki, kim isteer dünneylän dost olmaa, o duşman olêr Allaha.

⁵ Osa sanêrsınız, boşuna mı Ayoz Yazıda dener: «Allah kızgınnıklan isteer duhu, angısını koydu içimizä».

⁶ Ama O bizä taa büük bir hayır baaşlêêr, onuştan deer: «Allah şişkinnerä karşı durêr, ama yalpaklara hayır baaşlêêr».

⁷ Allahın zapına verilin, diavola karşı durun, da o sizdän kaçacek.

⁸ Eer siz Allaha yaklaşarsaydınız, O da sizä yaklaşacek. Ellerinizi paklayın, ey, günahkerlär! Üreklerinizi temizleyin, ey, kararsızlar!

⁹ Kahırlanın, aalayın hem sızlayın. Sizin gülüşünüz aalayışa hem sevinmeniz güçlää dönsün.

¹⁰ Yavaş olun Saabinin önündä, da O üüseklendirecek sizi.

¹¹ Biri-biriniz için fena lafetmeyin, kardaşlar. Kim fena lafeder yada daava keser kardaşına, o fena lafeder hem daava keser Ayoz Zakona. Ama eer sän daava kesärseydin Zakona, ozaman sän diilsin zakonu tamannayan, ama zakona daavacı.

¹² Allah, zakon kuran hem daava kesän – birdir. O kurtarêr, O da yok eder. Ama sän kimsin, ani başkasına daava kesersin?

Umutlanmayın kendinizä

¹³ Şindi sesleyin siz, ani deersiniz: «Büün yada yaarına filan kasabaya gidecez, orada bir yıl yaşayacez, alış-veriş yapacez da para kazanacez».

¹⁴ Siz bilmeersiniz, ne yaarına sizinnän olacek! Zerä nedir sizin yaşamanız? Yaşamak bir buu gibidir, az vakıt görüner, sonda yok olêr.

¹⁵ Siz başka türlü deyin: «Eer Allah istärseydi, da biz yaşarsaydık, bunu eki öbürünü yaparız».

¹⁶ Ama şindi üünersiniz hem şişkinniklän lafedersiniz. Butürlü üünmeklär herzaman kötü.

¹⁷ Ölä ki, kim biler nicä yapmaa iilik da yapmêêr, o günah yapêr.