İakovun 3 - Enі Baalantı

Dilimizi kullanmak

¹ Kardaşlarım, çoyunuz üüredici olmayın, zerä bilersiniz, ani bizä bir taa keskin daava olacek.

² Zerä hepsimiz çok sıra yanılêrız. Kim laflan yanılmêêr, o taman adam, angısı var nicä tutsun çılbırda bütün güüdesini.

³ Biz beygirlerin aazlarına kantırma koyêrız, ki terbeeleyelim onnarı. Butürlü onnarın bütün güüdelerini kullanêrız.

⁴ Ya bakın, ne büük gemilär sert lüzgerlerdän götürüler, ama ne küçük dümennän kullanılı, onnar giderlär orayı, nereyi gemici isteer.

⁵ Hep ölä dil dä, güüdedä küçük bir ek, ama büük işlärlän üünär. Bakın, bir küçük ateş ne büük bir daa tutuşturup-yakêr.

⁶ Dil dä ateş gibidir, güüdemizin ekleri arasında bir kötülük dünnesi. Dil bütün güüdemizi kirleder hem yaşamamızın tekerleeni kızdırêr, zerä kendi dä cendem ateşindän kızdırılan.

⁷ Herbir soy canavarlar, kuşlar, sürünennär hem denizdä yaşayannar adamdan zaplandı.

⁸ Ama dili kimsey zaplayamêêr. O bir fenalık, dolu ölüm zihirinnän, angısını kimsey durgudamêêr.

⁹ Dilimizlän Allah Bobayı metinneeriz, hep o dilimizlän insannarı betvalêêrız, angıları Allaha tıpkı yaradıldı.

¹⁰ Hep bir aazdan çıkêr hem metinnik, hem betva! Olmaz bölä olsun, kardaşlarım.

¹¹ Olur mu nasıl bir sızıntıdan aksın hem tatlı, hem acı su?

¹² Kardaşlarım, yok nasıl incir fidanı yapsın zeytin, yada baa çotuu yapsın incir. Hep ölä, yok nasıl bir sızıntıdan aksın hem tuzlu, hem tatlı su.

İki soy aariflik

¹³ Kim sizin aranızda aarif hem akıllı? Kendi yaptıklarını göstersin ii taşımasınnan hem münüzlüklän, ani aarifliktän geler.

¹⁴ Ama eer sizin üreenizdä varsaydı kin, kıskançlık hem kendini sevmäk, yok neçin üünäsiniz hem aslılıı yalandırasınız.

¹⁵ Busoy aariflik yukardan inmäz, ama geler erdän, insan tabeetindän, fena duhlardan.

¹⁶ Zerä neredä kıskançlık hem kärcılık, orada sırasızlık hem hertürlü fena işlär.

¹⁷ Ama yukardan inän aariflik hepsindän öncä temiz, sora uslu, yalpak, sesleyici, dolu acıyannıklan hem ii işlärlän, üzä bakmaz, ikiüzlü olmaz.

¹⁸ Dooruluun meyvası ekilir uslulukta onnardan, kim usluluk için çalışêr.