İakovun 1 - Enі Baalantı

¹ Bän, İakov, Allahın hem Saabi İisus Hristozun çıraa, daanıkta oniki tamızlaa seläm yollêêrım.

Denenmäk hem yanılmak

² Bütün sevinmeliklän kabledin, kardaşlarım, açan geçersiniz hertürlü denemeklerdän,

³ bileräk, ani denemeklär inanda sizi dayanmaya alıştırêr.

⁴ Bakın, dayanmak işini taman yapsın, ki siz tamannanmış hem kusursuz olasınız, hem hiç bir kederiniz olmasın.

⁵ Eer sizdän birisinä aariflik etişmärseydi, istesin Allahtan, Angısı cömertliklän herkezinä verer, hiç maana aaramêêr, da ona verilecek.

⁶ Ama salt inannan istesin, hiç şüpelenmeyeräk, zerä kim şüpelener, o benzeer deniz dalgasına, ani lüzgerdän koolanêr hem saurulêr.

⁷ Bölä adam sanmasın, ani Saabidän bişey kabledecek.

⁸ Adam, ani ikileer, kararsızdır hepsi yaptıklarında.

⁹ Aşaa boydan kardaş sevinsin kendi üüsekliinnän.

¹⁰ Zengin olan üünsün kendi alçaklıınnan, zerä o da kır çiçää gibi geçecek.

¹¹ Açan gün kızgın sıcaannan duuêr, ot kuruyêr, otun çiçää erä düşer, görüşü hem gözellii kaybeler. Hep ölä zengin olan da, kendi işlerini yaparkan, sörpeşer.

¹² Ne mutlu adam, kim dayanmaklan denemekleri geçirer, zerä, denenmiş olup, yaşamak feneţini kabledecek, ani adadı Saabi hepsinä onnara, kim Onu sever.

¹³ Kim denenmektä yanılêr, demesin: «Allah beni yanılttı», zerä Allah Kendi kötülüklän yanıldılmaz hem başka birkimseyi dä yanıltmaz.

¹⁴ Ama herkez, kim yanılêr, kendi istemesinnän çekilmiş, aldanêr.

¹⁵ Sora istemesi, gebä kalıp, günahı duudurêr, günah da, olgunnandıynan, ölüm getirir.

¹⁶ Sevgili kardaşlarım, aldanmayın!

¹⁷ Her ii vergi hem her taman baaşış yukardan geler, Bobadan, Ani yarattı gökteki şafkları, da Angısında yok diişilmäk ne dä döneklik gölgesi.

¹⁸ O Kendi istediinä görä yaptı, ki biz duualım aslılık sözünnän da edenelim ilk eri onnarın arasında, ne O yarattı.

İşitmäk hem tamannamak

¹⁹ Bunu ii bilin, sevgili kardaşlarım, herkezi seslemeyä çabuk olsun, lafetmeyä yavaş hem üfkelenmeyä sabur olsun.

²⁰ Zerä insan üfkesi Allahın dooruluunu yapamaz.

²¹ Onuştan brakılın hertürlü kirli işlerdän hem kötülüktän, ani her tarafa yayılmış, da yavaşlıklan kabledin ekilmiş sözü, ani var nicä kurtarsın cannarınızı.

²² Allahın sözünü sade işitmäklän kendinizi aldatmayın, Allahın sözünün tamannayıcıları olun.

²³ Zerä kim sözü işidip tamannamêêr, o adam benzär olêr birisinä, angısı aynada bakêr üzünä da görer, nasıldır kendisi,

²⁴ baktıktan sora gider da, nesoy kendisi, hemen unudêr.

²⁵ Ama kim ii bakêr o taman Zakona, ani serbestlik verer, da onu ileri dooru tamannêêr, diil nicä bir unudan sesleyici, ama nicä bir çalışkan işçi, bu adam kendi işindä mutlu olacek.

²⁶ Eer birkimsey kendini allahçı sayarsaydı, ama kendi dilini zaplamarsaydı, o kendi-kendini aldadêr, onun allahçılıı da naafilä.

²⁷ Allah Bobanın önündä temiz hem kusursuz allahçılık budur: zeet çekän üüsüzleri hem dulları dolaşmaa hem kendini dünnedän lekesiz tutmaa.