Galatіyalılara 5 - Enі Baalantı

Koruyun serbestlii

¹ Hristos bizi serbest yaptı, ki serbest kalalım. Onuştan kaavi durun da verilmeyin enidän çıraklık boyunduruuna.

² Bakın, bän, Pavli, söleerim sizä, eer siz kesiklik yaparsaydınız, Hristozdan sizä hiç bir dä fayda olmayacek.

³ Enidän haber vererim herkezinä, kim kesiklik yapêr, ani o borçlu tamannasın bütün Zakonu.

⁴ Siz, ani isteersiniz dooru sayılmaa Zakonnan, Hristozdan ayırıldınız, Allahın iivergisindän yıraklandınız.

⁵ Ama biz Ayoz Duhun yardımınnan inannan bekleeriz dooru sayılmak umudu aslı çıksın.

⁶ Zerä İisus Hristozda yok paayı ne kesikliin, ne dä kesiksizliin, ama inanın, ani sevgiylän işleer.

⁷ Siz ii gidärdiniz. Kim sizi durguttu, ki aslılıı seslämeyäsiniz?

⁸ Butürlü inan gelmeer Allahtan, ani sizi çaardı.

⁹ «Biraz maya bütün hamuru kabardêr».

¹⁰ Saabidä büük inanım var, ani siz başka türlü düşünmeersiniz, ama o, kim sizi dolaştırêr, cezasını çekecek, kim dä o olsa.

¹¹ Bän, kardaşlar, eer taa nasaat edäydim kesiklii, ozaman neçin beni koolayaceydılar? Stavroz kimseyä köstek koymayaceydı.

¹² Olsa, ki onnar, kim sizi debreştirerlär, kendi-kendilerindän kesselär hepsiciini!

İnsan tabeeti hem Ayoz Duh

¹³ Serbestlää çaarılmışınız, kardaşlar, sade serbestliktän yapmayın, ki izmet edäsiniz teninizä, ama sevgiylän izmet edin biri-birinizä.

¹⁴ Zerä bütün Zakon bu sözlärlän tamannanêr: «Yakın olanını seväsin, nicä kendini».

¹⁵ Eer siz biri-birinizi kemirirseydiniz hem iyärseydiniz, bakın, ki biri-birinizi telef etmeyäsiniz!

¹⁶ Bunu demää isteerim: yaşayın Ayoz Duha görä, ozaman tamannamazsınız tenin hamellerini.

¹⁷ Zerä ten isteer, ne Duha karşı, Duh da isteer, ne tenä karşı. Onnar biri-birinä karşı durêrlar; ölä, ki siz yapamêêrsınız, ne isteersiniz.

¹⁸ Eer siz Duhtan kullanılmış olarsaydınız, diilsiniz Zakonun zapında.

¹⁹ Tenin işleri belli. Onnar: orospuluk, diilpaklık, hayırsızlık,

²⁰ idollara baş iiltmäk, büücülük, duşmannık, kavga, kıskanmak, üfkä, çekiş, ayırılmaklık, bölünmäk,

²¹ haseetlik, /öldürücülük,/ sarfoşçuluk, zulumnuk hem buna benzär işlär dä. İleri söleerim sizä, nicä dä söledim, ani kim yapêr bölä işleri, Gök Padişahlıında mirasçı olmayacek.

²² Ama Ayoz Duhun meyvası – sevgi, sevinmäk, usluluk, saburluk, acıyannık, iilik, inancılık,

²³ yavaşlık, kendini zapetmäk. Bunnara karşı yok zakon.

²⁴ Ama kim Hristozun, onnar stavroza gerdilär teni onun hamellerinnän hem istemeklerinnän.

²⁵ Eer Duhlan yaşarsaydık, ozaman Duha görä gezelim.

²⁶ Olmayalım şişkinnenän, biri-birimizi küstürän, biri-birimizi kıskanan insannar.