Galatіyalılara 4 - Enі Baalantı

¹ Bunu demää isteerim: nekadar vakıt mirasçı uşak bulunêr, o bişeylän çıraktan ayırılmêêr, makar ki çorbacı hepsinä.

² O bakıcıların hem vekillerin zapında o vakıdadan, nezamanadan bobası bennedi.

³ Butürlü biz dä, nekadar vakıt duhçasına uşaktık, okadar vakıt çırak bulunardık dünneyin başlankı üüretmeklerinä.

⁴ Ama, açan vakıt tamannandı, Allah bizä Kendi Oolunu yolladı, Angısı duudu karıdan da yaşadı Zakonun zapında,

⁵ ki kurtarsın onnarı, kim bulunêr Zakonun zapında, da busoy oolluk edenelim.

⁶ Çünkü oolluk edendiniz, Allah Kendi Oolunun Duhunu üreenizä yolladı, ani baarêr «Avva!» – annaması «Boba!»

⁷ Onuştan sän şindän sora diilsin çırak, ama ool, da çünkü ool oldun, Allah seni mirasçı yaptı.

Pavlinin kahırı galatiyalılar için

⁸ Vakıdın birindä, açan tanımardınız Allahı, çırak bulunardınız allahlara, angıları diil hakına allah.

⁹ Ama şindi tanıyêrsınız Allahı, taa doorusu, Allah sizi tanıyêr. Öleysä, nasıl enidän geeri dönersiniz yufka hem paasız başlankı üüretmeklerä, angılarına siz enidän çırak olmaa isteersiniz?

¹⁰ Tutêrsınız günneri, ayları, vakıtları hem yılları.

¹¹ Sizin için korkêrım, sizdä savaşmam naafilä kalmasın.

¹² Kardaşlar, yalvarêrım, olun benim gibi, zerä bän dä oldum sizin gibi. Siz bişeylän bana zarar yapmadınız.

¹³ Nicä bilersiniz, ilk sıra nasaat ettim sizä İi Haberi, çünkü güüdeycesinä hastaydım.

¹⁴ Bu hastalıım sizä bir denemäkti. Buna bakmayarak, siz beni aşaalamadınız hem retetmediniz. Siz beni, nicä Allahın angilini, kablettiniz, nicä İisus Hristozu Kendini.

¹⁵ Ne oldu o mutluluktan, ani ozaman duyardınız? Şaatlık ederim, ani eer olaydı kolay, siz çıkaraceydınız kendi gözlerinizi da bana vereceydiniz.

¹⁶ Acaba, şindi bän sizä duşman mı oldum, çünkü aslısını söledim?

¹⁷ O adamnar sizi kazanmaa girişerlär, ama diil ii neetlän. Salt isteerlär sizi bizdän ayırsınnar, ki onnar için çalışasınız.

¹⁸ İidir, diil sade açan bän aranızdayım, çalışkan olasınız, ama herzaman.

¹⁹ Bän sizin için, uşaklarım, enidän ana zeetlerindeyim, o vakıdadan, açan siz etişeceniz Hristos gibi olasınız.

²⁰ Nekadar istärdim şindi sizinnän olayım da sesimi diiştireyim, zerä şaşêrım bu halınıza!

Agar hem Sarra

²¹ Söleyin bana siz, kim Ayoz Zakonun zapında olmaa isteersiniz, ne, bilmeersiniz mi, ne deer Zakon?

²² Var yazılı, ani Avraamın iki oolu vardı: birisi çırak karıdan, öbürü serbest karıdan.

²³ Oolu çırak karıdan öbür adamnar gibi duudu, ama oolu serbest karısından Allahın adamasına görä duudu.

²⁴ Bunnarı lääzım annamaa bir benzetmäk gibi. Bu karılar – iki baalantı: birisi Sinay bayırından, çıraklık için duuduran, angısı Agar.

²⁵ Agar – Araviyada Sinay bayırıdır, da şindiki İerusalimä benzeer, zerä o şindi çıraklıkta bulunêr uşaklarınnan barabar.

²⁶ Ama gökteki İerusalim serbest. Odur bizim anamız.

²⁷ Zerä var yazılı: «Sevin sän, uşak duuduramayan karı, ani hiç duudurmadın. Sesini kaldır da baar, sän, ani duudurmak aarısı çekmedin, zerä brakılmış karının taa çok uşaa olacek, nekadar onun, kimin kocası var».

²⁸ Kardaşlar, siz dä, nicä İsaak, Allahın adamasına görä duulmuş uşaklarsınız.

²⁹ Ama nicä ozaman ool, kim duudu öbür adamnar gibi, koolardı onu, kim duudu Allahın Duhunun sözünä görä, hep ölä olêr büün dä.

³⁰ Ama ne deer Ayoz Yazı? «Koola çırak karıyı hem onun oolunu, zerä çırak karının oolu mirasçı olmayacek barabar serbest karının oolunnan».

³¹ Ölä ki, kardaşlar, biz diiliz çırak karının uşakları, ama serbest karının.