Galatіyalılara 1 - Enі Baalantı

Seläm

¹ Bän, Pavli, diil insannardan seçilmiş apostol eki insanın aracılıınnan, ama İisus Hristozdan hem Allah Bobadan, Angısı İisusu ölümdän diriltti,

² hem hepsi benimnän olan kardaşlar seläm yollêêrız Galatiya kliselerinä.

³ İivergi hem usluluk sizä Allah Bobadan hem Saabi İisus Hristozdan,

⁴ Angısı verdi Kendini bizim günahlar için, ki kurtarsın bizi büünkü kötü dünnedän, bizim Allah Bobanın istediinä görä.

⁵ Ona olsun diveçtän divecä metinnik! Amin.

Salt bir İi Haber var

⁶ Şaşêrım, ne tez dönersiniz Ondan, Kim Hristozun iivergisinnän çaardı sizi bir diişik ii haberä.

⁷ Diil, ani var başka ii haber, ama var kimi insannar, ani sizi dolaştırêrlar da isteerlär Hristozun İi Haberini bozsunnar.

⁸ Artık eer biz kendimiz yada bir angil göktän nasaat edärsä bu İi Haberä karşı, ani sizä nasaat ettik, betvalı olsun.

⁹ Şindi enidän söleerim, ne baştan da söledim: Eer birkimsey nasaat edärsä karşı bu İi Haberä, ani siz kablettiniz, betvalı olsun.

¹⁰ Bän şindi insanın kayıllıını mı aarêêrım osa Allahın mı? Acaba insana mı bakêrım kendimi beendireyim? Eer insana kendimi beendirmää bakarsam, ozaman olmarım Hristozun çıraa.

Pavli annadêr, nicä oldu apostol

¹¹ Kardaşlar, isteerim, biläsiniz, ani İi Haber, angısını nasaat ettim sizä, kurulu diil insandan.

¹² Zerä bän kablettim hem üürendim onu diil insandan, ama İisus Hristozun açıklamasından.

¹³ Siz işittiniz, nicä vakıdın birindä yaşardım iudey dininä görä. Bän Allahın klisesini cansız koolardım da bakardım onu telef etmää.

¹⁴ Bän iudey dinindä akrannarımın çoyundan taa öncüydüm benim milletimdä. Bendä vardı bir terbeesiz kıyaklık dedelerimin adetleri için.

¹⁵ Ama Allah beni duumaktan ileri ayırdı da çaardı Kendi iivergisinnän da, açan kayıl oldu

¹⁶ bana açsın Kendi Oolunu, ki Onun İi Haberini nasaat edeyim yabancı milletlerä, bän danışmadım bir dä adama.

¹⁷ Gitmedim İerusalimä, onnara, kim benim önüm sora apostoldu, ama çabuk gittim Araviyaya da sora enidän Damask kasabasına geeri döndüm.

¹⁸ Üç yıldan sora gittim İerusalimä, buluşayım Kifaylan deyni, da onda kaldım onbeş gün.

¹⁹ Başka apostolları görmedim, İakovdan kaarä, angısı Saabinin kardaşı.

²⁰ Allahın önündä söleerim, ani, ne yazêrım sizä, diil yalan.

²¹ Ondan sora bän gittim Siriya hem Kilikiya erlerinä.

²² İudeyada Hristozun kliseleri benim üzümü taa görmediydilär.

²³ Salt bunu işitmiştilär: «O, kim bizi bir vakıt koolardı, şindi nasaat eder inan için, angısını taa ileri yok etmää bakardı».

²⁴ Da metinnärdilär Allahı benim için.