Fіlіplіlerä 4 - Enі Baalantı

Bitki nasaatlar

¹ Ölä ki, sevgili kardaşlarım, angılarını çok özledim, benim sevinmeliim hem feneţim, bölä kaavi durasınız Saabidä, sevgililär.

² Yalvarêrım Evodiyaya, yalvarêrım Sintihiyä, Saabidä olun bir annamakta.

³ Sän dä, Sizig, hakına kafadarım, yardım et bu karılara, ani savaştılar İi Haberi nasaat etmää benimnän, Klementlän hem kalannarlan, ani benimnän işleerlär, angıların adları yazılı yaşamak kiyadında.

⁴ Sevinin Saabidä herzaman, taa bir sıra deerim, sevinin.

⁵ Sizin yalpaklıınız hepsi insannardan bilinsin. Saabi yakın.

⁶ Kahırlanmayın bişey için, ama hertürlü duada hem yalvarmakta açın sizin istemeklerinizi Allahın önündä şükürlüklän.

⁷ Ozaman Allahın selemeti, ani taa üüsek herbir akıldan, koruyacek sizin üreklerinizi hem fikirlerinizi İisus Hristozda.

⁸ Bitkidä, kardaşlarım, ne var hakına, saygılı, dooru, temiz, sevimni hem mayıl, ne var ii hem metinni, onnar için düşünün.

⁹ Ne üürendiniz, kablettiniz, işittiniz hem gördünüz bendä, onnarı tamannayın, da selemet verän Allah sizinnän olacek.

Pavlinin şükürü

¹⁰ Bän pek sevindim Saabidä, ani siz enidän başladınız benim için meraklanmaa. Siz herzaman meraklanardınız benim için, ama yoktu kolaylıınız.

¹¹ Deerim bunu, diil ani benim zorum var. Zerä bän üürendim şükür olayım o halda, angısında bulunêrım.

¹² Bilerim yaşamaa, nicä yoklukta, hep ölä bollukta da. Üürendim sekreti, ani hererdä, herbir halda, nicä tok olayım, hep ölä aaç da durayım, nicä bollukta, hep ölä zorlukta da bulunayım.

¹³ Hepsini becererim Hristozda, ani beni kaavileer.

¹⁴ Ama siz ii yaptınız, ani benimnän pay aldınız benim zeetlerimdä.

¹⁵ Siz dä, Filiplilär, bilersiniz, ani açan İi Haber daalmaa başladı, da bän çıktım Makedoniyadan, bir dä klisä pay almadı yardım vermektä hem nasaat kabletmektä, sizdän kaarä.

¹⁶ Bän Saloniktä bulunarkan, siz birkaç sıra yardım yolladınız bana, açan zorum vardı.

¹⁷ Söleerim bunu, diil ani baaşış aarêêrım. Tersinä, aarêêrım bir kazanç sizin faydanız için.

¹⁸ Bendä hepsi var, bollukta yaşêêrım. Bän tokum, kablettim, neyi Epafroditin elinnän yollamışınız. Bu – nicä gözäl kokulu bir baaşış, bir kurban, angısını Allah kableder hem beener.

¹⁹ Allahım da dolduracek hepsi sizin lääzımnıklarınızı Kendi zebilliktän zenginniinä görä İisus Hristozda.

²⁰ Allah Bobamıza olsun metinnik diveçtän divecä! Amin.

²¹ Selämneyin İisus Hristozun bütün ayoz halkını. Kardaşlar, ani benimnän, sizä seläm yollêêrlar.

²² Allahın bütün ayoz halkı, hepsindän çok – Kesarın evindekilär, sizä seläm yollêêrlar.

²³ Saabi İisus Hristozun iivergisi olsun sizin duhunuzlan. /Amin./