Fіlіplіlerä 2 - Enі Baalantı

Hristos – örnek bizä

¹ Hristos sizi girginneder, sevgisinnän iilendirer, Ayoz Duhtan pay alêrsınız, üreenizdä sevgi hem acıyannık var.

² Onuştan benim sevinmemi doldurun: olun bir neettä hem bir sevgiliktä, nicä bir canda hem fikirliktä.

³ Bişey yapmayın kendinizi kaldırmak için eki boşuna üünmäk için, ama yavaşlıklan hatırlayın biri-birinizi, üüseklendireräk başkasını taa çok, nekadar kendini.

⁴ Düşünmeyin salt kendiniz için, ama başkası için dä düşünün.

⁵ Sizdä olsun hep o düşünmäk, ne vardı İisus Hristozda.

⁶ Makar ki O Allahın simasıydı, saymadı, ani düşer kendini koymaa Allahlan bir,

⁷ ama metinniindän soyunup, aldı çırak simasını da oldu insan gibi.

⁸ Olarak insan görümündä, O aşaalattı Kendini da sesledi Allahı ölümä kadar, artık ölümä kadar stavrozda.

⁹ Onuştan Allah Onu pek çok üüsekletti da baaşladı Ona hepsi adlardan taa üstün bir ad,

¹⁰ ki İisusun adını ikramnayarak hepsi göktekilär, erdekilär hem er altındakılar diz çöksünnär,

¹¹ hem herbir dil açık sölesin, ani İisus Hristos – Saabi, da bununnan Allah Boba metinnensin.

Çıkarın başa kurtulmanızı

¹² Ölä ki, sevgili kardaşlarım, nicä herzaman seslediniz, diil sade açan benim yanımdaydınız, ama taa çok şindi, açan bän yokum aranızda, saygıylan hem korkuylan çıkarın başa kurtulmanızı.

¹³ Zerä Allah O, Kim işleer sizdä, ki hem isteyäsiniz hem yapasınız, ne O beener.

¹⁴ Hepsini yapın, mırıldanmayarak hem çekişmeyeräk,

¹⁵ ki olasınız kusursuz hem temiz, Allahın lekesiz uşakları bu bozuk hem sapık senselenin ortasında. Onnarın arasında siz, sıkı tutarak yaşamak verän sözü, şafk edersiniz, nicä yıldızlar göktä.

¹⁶ Ölä ki olacek neylän üüneyim Hristozun günündä, ani boşuna çalışmadım hem boşuna işlämedim.

¹⁷ Nicä şarap döküler kurbanın üstünä, hep ölä benim kanım da lääzım dökülsün, ki tamannansın sizin inanınızın izmetçilii. Ama hep okadar sevinerim hem hepsinizin sevinmeliinizdän pay alêrım.

¹⁸ Hep ölä siz dä sevinin hem benim sevinmeliimdän pay alın.

¹⁹ Saabi İisusa umutlanêrım, ani tezdä yollayacam sizä Timofeyi, ki benim dä, haber sizdän kabledip, ürääm uslansın.

²⁰ Zerä başka kimseyim yok, ki onun gibi düşünsün hem sizin için bütün ürektän çalışsın.

²¹ Zerä hepsi aarêêr kendinä fayda, diil İisus Hristoza.

²² Ama bilersiniz, nekadar denenmiş adam Timofey, zerä İi Haberi nasaat ederäk benimnän barabar izmet etti, nicä bir ool bobasınnan.

²³ Umutlanêrım, onu çabuk yollayım sizä, gördüynän, ne olacek benimnän.

²⁴ Çok inanêrım Saabiyä, ani tezdä kendim dä gelecäm.

²⁵ Ama esapladım, ki lääzım sizä geeri yollayım kardaşımı Epafroditi, angısı benimnän barabar işleer hem savaşêr, da angısını siz yolladınız, ki yardım etsin bana zorluklarımda.

²⁶ Zerä o pek özlemiş sizi hepsinizi, da çok güçlendi, çünkü onun hastalıı için işittiniz.

²⁷ Hakına, o hastalandıydı da ölüm döşeendeydi, ama Allah acıdı onu, da diil sade onu, ama beni dä, ki olmasın bana kahır üstünä kahır.

²⁸ Onuştan onu taa büük havezlän yollêêrım, ki siz, onu enidän görüp, sevinäsiniz, bän dä taa az kahırlanayım.

²⁹ Kabledin onu Saabidä bütün sevinmeliklän da butürlü insannarı hatırlayın.

³⁰ Zerä o Hristozun işi için yakındı ölümä da yaşamasını ortalaa koydu, ki tamannasın izmetçilii, ne etişmärdi sizdä bana deyni.