Fіlіplіlerä 1 - Enі Baalantı

Seläm

¹ İisus Hristozun çırakları, bän, Pavli, hem Timofey, seläm yollêêrız İisus Hristozun bütün ayoz halkına, ani bulunêr Filip kasabasında, hep ölä episkoplara hem diakonnara.

² İivergi hem usluluk olsun sizä Allah Bobadan hem Saabi İisus Hristozdan.

Şükür hem dua

³ Şükür ederim benim Allahıma herzaman, açan aklıma getirerim sizi.

⁴ Herzaman, herbir duamda hepsiniz için sevinmäklän dua ederim,

⁵ zerä ilk gündän şindiyä kadar siz pay alêrsınız İi Haberi haberlemektä.

⁶ Pek inanêrım, ani O, Kim çekettirdi sizdä bu ii işi, bitirecek İisus Hristozun gününä kadar.

⁷ Dooru, ani bölä sizin için düşünerim, zerä siz benim üreemdäysiniz. Hem açan sincirlärlän baalıyım, hem da açan İi Haberi koruyêrım hem aslısını çıkarêrım, siz hepsiniz pay alêrsınız bu hayırda benimnän barabar.

⁸ Allah bana şaat, ani bän özleerim hepsinizi İisus Hristozun sevgisinnän.

⁹ Dua ederim, ki sizin sevginiz taa çok hem taa çok büüsün bilgidä hem annamakta.

¹⁰ Ozaman tanıyabilirsiniz, ne faydalı, ki olasınız temiz hem kusursuz Hristozun günündä,

¹¹ dolu dooruluk meyvasınnan, ani geler İisus Hristozdan, Allahın şanı için hem metinnii için.

İi Haberin nasaadı

¹² İsteerim biläsiniz, kardaşlar, ani benim halım fayda oldu taa çok İi Haberin haberlenmesinä.

¹³ Ölä ki annadı herkezi imperatorun binasında hem hepsi kalan insannar, ani bän sincirlärlän baalıyım Hristos için.

¹⁴ Çoyu kardaşlardan, Saabiyä umutlanarak, benim sincirlerimdän taa çok kıyışmak edendilär da korkusuz söleerlär Allahın sözünü.

¹⁵ Dooru, ani kimisi nasaat eder Hristos için haseetliktän hem yarışmaktan, ama başkaları ii neetlän.

¹⁶ Kimisi bunu yapêr sevgiliktän, bileräk ani bän koyuldum, ki koruyayım İi Haberi.

¹⁷ Başkası haberleer Hristozu kendini kaldırmak için, diil pak neetlän, sanarak, ani bununnan zeedeleerlär zeetlerimi kapanda.

¹⁸ Ama ne zararı var? İstär yapınmaklan, istär haliz ürektän, Hristos haberlener. Bunun için sevinerim hem taa çok sevinecäm dä.

¹⁹ Zerä bilerim, ani bu bana kurtulmak getirecek sizin dualarınızlan hem İisus Hristozun Duhunun yardımınnan.

²⁰ Havezlän bekleerim hem umutlanêrım, ani hiç utanmış olmayacam, ama kıyışmaklan lafedecäm, da nicä herzaman, ölä şindi dä, yaşarsam da, ölürsäm dä, Hristos benim güüdämnän metinnenecek.

²¹ Zerä benim için yaşamak – Hristos, ölüm – kazanç.

²² Eer ileri dooru yaşarsam güüdedä, faydalı işlär yapabilärim. Ama bilmeerim, ne ayırayım.

²³ Çeker beni bu da, o da. İsteerim geçineyim bu dünnedän da olayım Hristozlan, zerä bu çok taa ii.

²⁴ Ama güüdedä kalarsaydım, bu sizin için taa lääzımnıklı.

²⁵ Çok inanarak buna, bilerim, ani yaşayacam da ileri dooru sizinnän hepsinizlän barabar olacam, ki siz, inanda ilerleyip, sevinäsiniz.

²⁶ Ozaman taa çok üünäbileceniz Hristos İisuslan benim için, açan sizä geeri gelecäm.

²⁷ Sade yakışıklı yaşayınız Hristozun İi Haberinä görä, ki eer gelirsäm da görürsäm sizi, eki gelmärsäm, işideyim sizin için, ani duhça birliktä durêrsınız, nicä bir can savaşarak, ki İi Haber inanılsın,

²⁸ hem karşı durannardan hiç korkmayarak. Bu onnar için bir nışan, ani onnar kaybeleceklär, ama siz kurtulacenız. Bu da var Allahtan.

²⁹ Zerä sizä Hristos için verili, diil sade Ona inanasınız, ama zeetlenäsiniz dä Onun için.

³⁰ Siz hep ölä savaşêrsınız, nicä bendä gördünüz hem nicä şindi benim için işidersiniz.