Fіlіmona 1 - Enі Baalantı

Seläm

¹ Bän, Pavli, İisus Hristos için kapancı, hem kardaş Timofey, seläm yollêêrız sana, Filimona, ani bizim sevgili kafadarımız iştä,

² kızkardaş Apfiyaya, Arhipä, ani bizim kafadarımız bir düüştä, hem senin evdeki klisenä.

³ İivergi sizä hem usluluk bizim Allah Bobadan hem Saabi İisus Hristozdan.

Şükür hem dua

⁴ Şükür ederim benim Allahıma, herzaman seni anarak benim dualarımda,

⁵ zerä işittim, nicä inandın Saabi İisusa hem nicä seversin Allahın hepsi ayoz halkını.

⁶ Dua ederim, ki sän çalışkan olasın haberlemektä senin inanını, çünkü tanıyêrsın herbir iilii, angısını kablettik İisus Hristozdan.

⁷ Zerä biz pek sevindik hem üreklendik senin sevgin için, zerä seninnän, kardaşım, hoşlandı ayozların ürekleri.

Pavlinin yalvarması Onisim için

⁸ Makar ki Hristozda var kıyışmaklıım, sana sımarlayım, ki yapasın, ne lääzım,

⁹ sayêrım, taa islää yalvarayım sana sevgiylän. Zerä yalvaran diil başkası, ama bän, ihtär Pavli, ani şindi İisus Hristos için kapancı.

¹⁰ Yalvarêrım sana benim uşaam için, Onisim için, angısını duudurdum, bulunarak baalı sincirlärlän.

¹¹ Bir vakıt o sana yaramardı, ama şindi yarar hem sana, hem bana.

¹² Onu, kim benim ürääm, sana geeri yollêêrım.

¹³ Bän istedim onu yanımda tutayım, ki senin erinä izmet etsin bana bu sincirlerdä, neylän baalıyım İi Haber için.

¹⁴ Ama izin olmayınca sendän, istämedim bunu yapmaa. İstedim, iilik yapasın diil zorlanmış, ama ii istediindän.

¹⁵ Zerä olabilir, ani o bir parça vakıda ayırıldı sendän, ki geeri onu alasın herzamana,

¹⁶ diil nicä bir çıraa, ama taa üstün çıraktan, olsun nicä bir sevgili kardaş, çok benim için, ama taa çok senin için, nicä bir insan, hep ölä nicä bir inancı Saabidä.

¹⁷ Eer sän beni paydaş sayarsaydın, kablet onu, nicä beni.

¹⁸ Eer seni bişeylän gücendirdiysä eki borçluysa sana, koy onnarı benim üstümä.

¹⁹ Bän, Pavli, yazdım kendi elimnän: kendim ödeyecäm. Demeerim, ani sän kendin dä bana borçluysun.

²⁰ Hakına, kardaşım, ver bana kolaylık Saabidä sendän faydalanayım, hoşlandır benim üreemi Hristozda.

²¹ Yazdım sana, çok inanarak, ani sän sesleyecän, da bilerim, ani yapacan taa çok, nekadar bän isteerim.

²² Hep ölä hazırla bir er bana, kalayım sendä, zerä umutlanêrım, sizin dualarınızlan, çıkıp kapandan, geleyim sizä.

Son selämnär

²³ Seläm yollêêr sana Epafras, ani kapancı benimnän bilä İisus Hristos için,

²⁴ Mark, Aristarh, Dimas, Luka, benim kafadarlarım.

²⁵ Bizim Saabi İisus Hristozdan iivergi sizin duhunuzlan olsun. /Amin./