Efeslіlerä 6 - Enі Baalantı

Bobalar hem uşaklar

¹ Uşaklar, sesleyin bobanızı hem ananızı Saabidä, zerä bu doorudur.

² «Hatırla bobanı hem ananı» – bu ilk sımarlamak, angısında var bir adamak:

³ «ki işlerin ii gitsin, da bu erdä ömürünüz uzun olsun».

⁴ Ama siz, bobalar, debreştirmeyin uşakları, ama büüdün onnarı, sınaştırarak Saabinin üüretmesinä hem akıl vereräk, nicä Saabi isteer.

Çıraklar hem çorbacılar

⁵ Çıraklar, ön verin sizin bu erdä çorbacılarınıza saygıylan hem korkuylan. Ürektän hatırlayın onnarı, nicä Hristozu.

⁶ İzmet edin onnara, diil sade onnarın gözleri önündä, kendinizi beendiräsiniz, ama nicä Hristozun kulları, hakına tamannayarak Allahın istediini.

⁷ İzmet edin ii neetlän nicä Saabiyä, ama diil nicä insana.

⁸ Zerä bilersiniz, ani herkez, olsun çırak, olsun serbest, kendi ii yaptıkları için Saabidän baaşış kabledecek.

⁹ Siz dä, çorbacılar, hep ölä olun çıraklarınızlan. Vazgeçin onnarı korkutmaktan. Bilin, ani onnarın hem sizin bir Çorbacınız göktä, O da pay tutmêêr kimseyä.

Saabidän kuvet alın

¹⁰ Bitkidä, kardaşlarım, kuvet alın Saabidän. O kaavilesin sizi Kendi büük kudredinnän.

¹¹ Kendinizi donadın Allahın bütün silählarınnan, ki durabiläsiniz karşı diavolun fitlemelerinä.

¹² Zerä bizim düüşmemiz diil kana hem tenä karşı, ama öndercilerä, zaabitlerä hem bu karannık dünneyin kuvetlerinä – fena duhlara karşı, ani bulunêr göklerdä.

¹³ Onuştan alın Allahın bütün silählarını, ki dayanabiläsiniz kötü gündä da, hepsini ensediktän sora, ayakça kalabiläsiniz.

¹⁴ Ozaman erinizdä durun, belinizi aslılıklan kuşayın, güüsünüzü dooruluk zirhinnän sarın,

¹⁵ ayaklarınıza ayak kaplarını giiyin, ki hazır olasınız İi Haberi usluluk için nasaat etmää.

¹⁶ Bunnarın üstünä alın inan kalkanını, neylän süündüräbileceniz yaramazın hepsi kızgın oklarını.

¹⁷ Kabledin kurtulmak başlıını hem Ayoz Duhun kılıcını, ani Allahın sözüdür.

¹⁸ Herzaman duhça dua edin hertürlü dualarlan hem yalvarmaklarlan. Bunun için uyanık durun bütün dayanmaklan hem yalvarmaklan Allahın hepsi ayoz halkı için.

¹⁹ Dua edin benim için dä, ki, aazımı açtıynan, bana laf verilsin, da kıyışmaklan açıklayım saklılıı İi Haber için,

²⁰ angısı için bän bir elçi gibiyim, sincirlärlän baalı. Dua edin, ani İi Haberi kıyışmaklan bildireyim, ki, nicä düşer, lafedeyim.

Sondakı selämnär

²¹ Ama, siz biläsiniz deyni benim halımı hem işlerimi, hepsi için annadacek sizä Tihik, bizim sevgili kardaş hem Saabinin inanç izmetkeri,

²² angısını maasuz yolladım, ki annatsın bizim halımızı sizä da havezlendirsin üreklerinizi.

²³ Usluluk hem sevgilik olsun inannan kardaşlara Allah Bobadan hem Saabi İisus Hristozdan!

²⁴ İivergi olsun hepsinnän, kim sever Saabimizi İisus Hristozu ölümsüz sevgiylän. /Amin./