Efeslіlerä 5 - Enі Baalantı

¹ Allaha benzeyin, nicä sevgili uşaklar.

² Sevgiliktä yaşayın, nicä Hristos bizi sevdi da Kendini bizim için verdi Allaha gözäl kokulu bir baaşış hem kurban gibi.

³ Ama orospuluk hem hertürlü diilpaklık eki tamahlık hiç anılmasın bilä sizin aranızda, çünkü bu yakışmaz Allahın ayoz halkına.

⁴ Ayıp sözlär, boş laflar hem kaskatı şakalar da olmasın. Bunnar yaraşmêêr. Taa islää şükür edin.

⁵ Zerä bilersiniz, ani hiç bir orospu, diilpak, eki tamah olan, angısı idollara baş iildän gibi, mirasçı olmayacek Hristozun hem Allahın padişahlıında.

⁶ Kimsey aldatmasın sizi boş laflarlan, zerä bu işlär beterinä Allahın üfkesi geler seslämeyän insannar üstünä.

⁷ Onnarlan paydaş olmayın.

Aydınnıkta yaşayın

⁸ Vakıdın birindä siz karannıktınız, ama şindi Saabidä aydınnıksınız. Götürün kendinizi, nicä aydınnık evlatları.

⁹ Zerä aydınnıın meyvası hertürlü iilik, dooruluk hem aslılık.

¹⁰ Bakın üürenmää, ne Saabi beener.

¹¹ Karannıın kısır işlerindä pay almayın. Ama takazalayın onnarı.

¹² Zerä ayıptır sölemää o işleri, ne onnar saklı yapêrlar.

¹³ Ama aydınnık hepsini belli eder, üzä çıkarıp, zerä hepsi, ne belli olêr, aydınnıktır.

¹⁴ Onuştan dener: «Sän, ani uyuyêrsın, uyan uykudan, ölüdän diril! Hristos sana şafk eder».

¹⁵ Ölä ki, ii bakın, nicä yaşêêrsınız. Olmayın fikirsiz, ama aarif olun.

¹⁶ Vakıdı paaya koyun, zerä bu günnär kötü günnär.

¹⁷ Onuştan olmayın akılsız, ama annayın, nedir Allahın istedii.

¹⁸ Sarfoş olmayın şaraplan, zerä sarfoşluk sizi zapsızlaa götürür, ama doluşun Ayoz Duhlan.

¹⁹ Biri-birinizä psalmalar, metinnik lafları hem duhça türkülär çalıp-söleyin. Bütün ürektän Saabiyä türkü hem hava çalın.

²⁰ Şükürluk getirin hepsi için herzaman Allah Bobaya bizim Saabi İisus Hristozun adınnan.

Karılar hem kocalar

²¹ Biri-birinizä ön verin, Hristozdan korkarak.

²² Karılar ön versinnär kendi kocalarına, nicä Saabiyä.

²³ Zerä koca baştır karıya, nicä Hristos da baştır kliseyä hem Kendisi güüdenin Kurtarıcısı.

²⁴ Nicä klisä ön verer Hristoza, hep ölä karılar da herbir iş üzerä ön versinnär kocalarına.

²⁵ Kocalar, sevin kendi karılarınızı, nicä Hristos da sevdi kliseyi da onun için kendini kurban verdi,

²⁶ ki onu, suylan yıkayıp, Allahın sözünnän pakladıktan sora ayozlasın,

²⁷ da onu Kendi önünä çıkarsın bir metinni klisä gibi, lekesiz, buruşuksuz hem başka kedersiz, ki ayoz hem kusursuz olsun.

²⁸ Kocalar da düşer kendi karılarını hep ölä sevsinnär, nicä kendi güüdelerini. Kim sever kendi karısını, o sever kendisini.

²⁹ Zerä kimsey bir sıra bilä kendi güüdesinä kin gütmedi, ama onu besleer hem yısıdêr, nicä Hristos kliseyi.

³⁰ Zerä biz Onun güüdesinin ekleri, /Onun etindän hem Onun kemiklerindän/.

³¹ «Onuştan adam brakacek kendi bobasını hem anasını, karısına baalanacek, da ikisi bir güüdä olaceklar».

³² Bu – bir büük saklılık. Bän lafederim Hristos için hem klisä için.

³³ Ama sizdän herkezi kendi karısını sevsin, nicä kendini; karı da hatır gütsün kocasına.