Efeslіlerä 4 - Enі Baalantı

Güüdenin birlii

¹ Butakım nasaatlêêrım sizi bän, Saabi için kapancı, yaşamanız yakışıklı olsun Onun çaarmasına görä, angısını kablettiniz.

² Herzaman yavaş, yalpak hem saburlu olun, dayanın biri-birinizä sevgiylän.

³ Çalışın korumaa Duhun birliini usluluklan, ani baalêêr sizi biri-birinizlän.

⁴ Bir güüdä var hem bir Duh, nicä siz çaarıldınız bir umuda, ani geler çaarılmanızdan,

⁵ Bir Saabi, bir inan, bir vaatizlik.

⁶ Allah birdir, Boba hepsinä. O hepsindän üstün, hepsinnän işleer hem hepsindä yaşêêr.

⁷ Herkezimizä bizä iivergi verildi o ölçüylän, ne Hristos baaşladı.

⁸ Onuştan dendi: «Üüseklää kalktı, esirleri plenä aldı, insannara baaşışlar verdi».

⁹ Lafın «kalktı» ne annaması var, eer diilsä bu, ani ilkin indi aşaa, er üstünä?

¹⁰ O, Kim indi, Odur, Kim kalktı taa üüsek hepsi göklerdän, ki hepsini doldursun.

¹¹ O koydu kimisini apostol, başkasını prorok, başkasını ii haberci, taa başkasını presviter hem üüredici,

¹² ki hazırlasınnar Allahın ayoz halkını izmetçilik yapmaa, Hristozun güüdesini yıvmaa,

¹³ ozamanadan, açan hepsimiz inannan hem Allahın Oolunu tanımaklan etişecez birlää, olgun adamnaa, Hristozun yaşlarının bütün ölçüsünä.

¹⁴ Ozaman artık olmayacez uşaklar gibi, angıları sallanêrlar dalgalarlan hem sürüklenerlär lüzgerlärlän – hertürlü üürenmäklän, ani insannar getirerlär şalvirliklän hem şiretliklän, ki başkalarını, aldadıp, yoldan saptırsınnar.

¹⁵ Ama, aslılaa görä sevgiliktä yaşayarak, her taraftan büüyecez da etişecez Ona, Kim Baştır, Hristoza,

¹⁶ Angısından bütün güüdä uygun birliktä toplu hem sıkı baalı hertürlü eklerin yardımınnan. Açan herbir ek düzgün işleer, güüdä büüyer hem sevgiliktä kaavileşer.

Eski yaşamak hem eni yaşamak

¹⁷ Onuştan tä ne söleerim hem yalvarêrım Saabinin adınnan: artık yaşamayın, nicä tayfännar yaşêêrlar, kendi boş düşünmeklerinä görä.

¹⁸ Onnarın fikirleri karardı, Allahın yaşamasına yabancı oldular, zerä bilmezlää düştülär hem ürekleri inatlaştı.

¹⁹ Etiştilär duygusuzlaa da verildilär ayıp işlerä. Onuştan tamahlıklan yapêrlar hertürlü diilpaklık.

²⁰ Ama siz Hristozu bölä üürenmediniz.

²¹ Şüpesiz, Onun sesini işittiniz hem Ondan üürendiniz, zerä aslılık İisusta.

²² Butakım, geçmiş yaşamanıza görä brakılın eski adamnıktan, angısı bozulêr aldangaç havezlärlän.

²³ Aklınız duhça taazelensin,

²⁴ hem giinin eni adamnıı, ani yaradılmış Allaha benzesin deyni, hakına dooruluklan hem ayozluklan.

²⁵ Onuştan brakılın yalandan, dooru lafedin yakın olanınızlan, zerä biz bir güüdenin ekleriyiz.

²⁶ «Üfkelenärseniz, günaha girmeyin». Üfkeniz üstünä gün kauşmasın,

²⁷ diavola er vermeyin.

²⁸ Kim hırsızlık yapardı, şindän sora hırsızlık yapmasın. Tersinä, çalışsın da kendi ellerinnän faydalı işlär yapsın, ki olsun kolay yoklukta olannara yardım etsin.

²⁹ Bir dä bozuk laf sizin aazınızdan çıkmasın, ama salt ii laf, ani duhça kaavileer insannarı, nicä düşer, ki sesleyennerä iivergi versin.

³⁰ Gücendirmeyin Allahın Ayoz Duhunu, Angısınnan mühürlendiniz kurtulmak günü için.

³¹ Hertürlü acılamak, kızgınnık, üfkä, baarmak, fena laf hem hertürlü kötü neet sizdän uzak olsun.

³² Ama biri-birinizlän ii ürekli hem yalpak olun. Biri-birinizi afedin, nicä Allah Hristozda sizi afetti.