Efeslіlerä 3 - Enі Baalantı

Allahın saklı kurulmuşu Pavliyä açıldı

¹ Onuştan bän, Pavli, İisus Hristozun izmetindä kapana düştüm sizin için, angınız başka milletlerdän.

² Sanêrım, ani işittiniz, ki Allah bana bu işi verdi, olayım Onun iivergisinin vekili sizin için.

³ Zerä bir açıklamaklan O bana bildirdi saklı kurulmuşunu, angısı için taa öncä kısadan yazdım.

⁴ Siz, onu okuyarak, tanıyabilirsiniz, nekadar ii annêêrım Hristozun saklı neetini,

⁵ angısı açık diildi adam oollarına geçän vakıtlarda, nicä şindi açıklandı Ayoz Duhtan Onun ayoz apostollarına hem proroklarına.

⁶ Kurulmuş budur: başka milletlär iudeylärlän barabar mirasçı, onnarlan bilä bir güüdä hem İi Haberä inanmaklan paycı olêrlar Allahın adamasından, angısını İisus Hristos tamannadı.

⁷ Bän Onun izmetkeri oldum, nasaat ederäk İi Haberi. Bu izmet baaşlandı Allahın iivergisinnän, ani verili bana Onun işleyän kuvedinnän.

⁸ Bana, Allahın ayoz halkından en küçüünä, bu iivergi verildi, ki nasaat edeyim başka milletlerä ii haberi Hristozun akıl ermäz zenginnii için

⁹ hem hepsini aydınnadayım, nasıl tertiplendi bu saklı kurulmuş, angısını Allah, hepsini yaradan, diveçliktän saklı tuttu.

¹⁰ Allah bunu yaptı, ki şindi klisä aracılıınnan bildirsin Kendi çoktürlü aarifliini öndercilerä hem zaabitlerä göklerdä,

¹¹ Kendi diveç kurulmuşuna görä, ani başardı İisus Hristozda, bizim Saabidä.

¹² Hristos bizä kolaylık verdi, ki biz, Ona inanarak, girginniklän hem kıyışmaklan yaklaşalım Allaha.

¹³ Ölä ki, yalvarêrım, umudunuzu kaybetmeyin benim zeetlerim beterinä, ani çekerim sizin için. Bunnar sizä metinnik kazandırêr.

Hristozun sevgisini tanımaa

¹⁴ Onuştan diz çökerim /bizim Saabi İisus Hristozun/ Bobasının önündä,

¹⁵ Angısından adlanêr hertürlü bobalık göktä hem erdä.

¹⁶ Dua ederim, ani Kendi metinni zenginniinä görä, Kendi Duhunnan kuvet versin da kaaviletsin sizi içyankı adamınızda,

¹⁷ ki inannan Hristos sizin üreklerinizdä yaşasın.

¹⁸ Dua ederim, ani siz, sevgiliktä köklenmiş hem temellenmiş olarak, annayabiläsiniz Allahın bütün ayoz halkınnan barabar, nekadar geniş, uzun, derin hem üüsektir Hristozun sevgilii,

¹⁹ da tanıyabiläsiniz o sevgilii, ani hertürlü bilgidän üstündür, ki Allahın bütün tamannıınnan dolasınız.

²⁰ Allah, bizdä işleyän kuvedinnän, var nasıl yapsın çok taa zeedä, nekadar biz isteeriz hem düşüneriz.

²¹ Ona metinnik olsun klisedä hem İisus Hristozda bütün senselelerdä, diveçtän divecä! Amin.