Efeslіlerä 1 - Enі Baalantı

Seläm

¹ Bän, Pavli, Allahın istediinä görä İisus Hristozun apostolu, seläm yollêêrım Allahın ayoz halkına Efes kasabasında, inancılara İisus Hristozda.

² İivergi hem usluluk sizä Allah Bobadan hem Saabi İisus Hristozdan.

İiliklär Hristozda

³ Allah metinnenmiş olsun, bizim Saabi İisus Hristozun Bobası, Ani göklerdä iisözledi bizi Hristozda hertürlü duhça iisözlemeklärlän.

⁴ Zerä O bizi seçti Hristozda dünneyin kurulmasından öncä, ki biz Onun önündä sevgidä ayoz hem kusursuz olalım.

⁵ O öncä kararladı, Kendisinä aaretlik alsın bizi İisus Hristozun aracılıınnan, Kendi istemesinä hem ii kurulmuşuna görä,

⁶ ki metedilsin Onun şannı iivergisi, ani baaşladı bizä Kendi sevgili Oolunda.

⁷ Hristozda kurtulmak edendik Hristozun kanınnan, günahlarımız afedildi Allahın cömert iivergisinnän,

⁸ angısını boldan bola verdi bizä. Hertürlü aarifliklän hem akıllılıklan

⁹ O açtı bizä Kendi saklı istediini, ii neetinä görä, angısını taa baştan kurdu Hristozda.

¹⁰ Bu neetä görä, ani tamannanacek, vakıt geldiynän, O hepsini göktekileri hem erdekileri Hristozda birleştirecek.

¹¹ Hristozda mirasçı da olduk, nicä öncä kuruluydu bizim için Allahın neetinä görä, Ani hepsini yapêr Kendi istediinä hem istediinä görä.

¹² Onuştan biz, ani taa baştan umutlandık Hristoza, ölä yaşayalım, ki, Allahın şanı metedilsin.

¹³ Açan işittiniz hakına sözü – İi Haberi, angısınnan kurtuldunuz, onu inandınız hem Hristozda siz dä adanmış Ayoz Duhlan mühürlendiniz.

¹⁴ Ayoz Duh bir garantiya gibi bizim mirasımız için, o vakıdadan, açan Allah heptenä kurtaracek, kimi edendi, ki Onun şanı metedilsin.

Pavli dua eder inancılar için

¹⁵ Onuştan, açan işittim, ani inanêrsınız Saabi İisus Hristoza hem seversiniz Allahın bütün ayoz halkını,

¹⁶ bän dä durmadaan şükür ederim sizin için hem anêrım sizi dualarımda,

¹⁷ ki bizim Saabi İisus Hristozun Allahı, metinni Boba, versin sizä Duhu, Ani sizi aarif yapacek hem açıklayacek Allahı, ki tanıyasınız Onu.

¹⁸ İsteerim, ani aklınızın gözleri aydınnıı görsün, ki biläsiniz, nedir umut, angısına sizi çaardı, ne zengindir Allahın metinni mirası Kendi ayoz halkı için,

¹⁹ hem nekadar kenarsız Onun büük kuvedi bizdä, inancılarda. Bu kuvet işleer nicä Onun büük kudretlii,

²⁰ ne gösterdi Hristozda, açan Onu diriltti ölüdän da oturttu göklerdä Kendi saa tarafına.

²¹ Taa üüsek koydu Onu herbir önderciliktän, zaabitliktän, kuvetliktän, çorbacılıktan hem her adtan, ani anılêr diil sade bu zamanda, ama gelär zamanda da.

²² Hepsini koydu ayakları altına da yaptı Onu, ki hepsinä baş olsun klisedä,

²³ angısı Onun güüdesidir hem angısı doldurêr Onu, Kim doldurêr hepsini herbir iş üzerä.