Çıfıtlara 9 - Enі Baalantı

Erdeki Ayoz çadır

¹ İlk baalantının da izmetçilik sıraları hem erdeki Ayoz eri vardı.

² Kuruldu bir Buluşmak Çadırı. İlk bölümün adı – «Ayoz er». Burada bulunardı şamdal hem sofra, dizili ekmeklärlän.

³ İkinci perdenin ardında vardı bölüm, adı «En ayoz er».

⁴ Buradaydı altın altar günnüklemäk için hem Baalantı Sandıı, ani her taraftan altın yaldızlıydı. Burada vardı bir altın kap mannaylan, Aronun filizlenmiş bastonu hem baalantının düz taşları.

⁵ Onnarın üstündä yalabık heruvimnär, angıları gölgelärdi acıyannık kapaanı. Şindi diildir vakıt bunnarın halizini lafetmää.

⁶ Bunnar erleştirildiktän sora popazlar herzaman çadırın ilk bölümünä girerlär, ki izmetçilik yapsınnar.

⁷ Ama ikinci bölümä sade baş popaz yılda bir sıra girer, alıp kan kurbandan, ani getirer kendisi için hem hepsi insanın bilmezlik günahları için.

⁸ Bununnan Ayoz Duh gösterer, nekadar vakıt çadırın ilk bölümü durêr, Ayoz erä yol diil açık.

⁹ Bu çadır bizim vakıtlar için bir benzetmäktir. Baaşışlar hem kurbannar getirilir, angıları yok nasıl heptän paklasınnar onnarın üzlerini, kim baş iilder Allaha.

¹⁰ Bu sıralar kurulu sade imeklär için, içmeklär için hem hertürlü yıkamaklar için, başka laflan, güüdä için, o vakıda kadar, açan Allahın aslı sıraları kuvedä girer.

Hristozun kanı

¹¹ Ama Hristos, gelär iiliklerin Baş popazı, gelip-girdi bir taa şannı hem käämil Buluşmak Çadırına, diil eldän yapılı, başka laflan, diil bu dünnedän.

¹² O girdi bir sıra herzamana Ayoz erä, diil tekä hem bızaa kanınnan, ama Kendi kanınnan, da bununnan diveç kurtulmak edendi.

¹³ Eer bızaaların hem tekelerin kannarı hem bir dananın külü serpilip ayozlarsaydı mındar olannarı hem paklarsaydı bulaşık güüdeleri,

¹⁴ nekadar taa çok Hristozun kanı, Angısı Diveç Duhlan Kendini lekesiz bir kurban getirdi Allaha, paklayacek sizin üzünüzü ölü yaptıklardan, ki izmet edäsiniz diri Allaha.

¹⁵ Onuştan Hristos Aracıdır eni baalantıda, ki onnar, kim çaarılmış, adanmış diveç mirası edensinnär. Hristos öldü, ki kurtarsın onnarı, kim sırayı bastı ilk baalantının vakıdında.

¹⁶ Çünkü baalantı kuvedä girsin deyni, lääzım ilkin göstermää, ani öldü o, kim baalantıyı yaptı.

¹⁷ Baalantı kuvedä girer salt ölümdän sora. Onun kuvedi hiç yok, nekadar vakıt baalantıyı yapan yaşêêr.

¹⁸ Ölä ki, ilk baalantı da lääzımdı kannan kaavilensin.

¹⁹ Dooru, ani Moisey, açan okudu hepsi sımarlamakları Ayoz Zakondan insanın önündä, aldı kan bızaa hem tekä kurbannarından da suylan, al boyalı yapaaylan hem issop çıbıınnan serpti, nicä kiyadı, hep ölä dä hepsi insanı,

²⁰ deyip: «Budur baalantının kanı, ani Allah sıraladı sizin için».

²¹ Hep ölä serpti kannan Buluşmak Çadırını hem hepsi izmetçilik kaplarını.

²² Zakona görä artık hepsi kannan paklanêr. Kan dökülmeyincä, bişey afedilmeer.

²³ Eer gökteki aslıların benzetmeleri butürlü lääzımsa paklansın, nekadar taa çok lääzımdı gökteki hakına aslıları paklasınnar taa ii kurbannarlan.

²⁴ Zerä Hristos girmedi eldän yapılı bir Ayoz erä, angısı hakına Ayoz erin benzetmesiydi, ama girdi uz gökä, ki

²⁵ diil ani çok sıra kurban Kendini getirsin, nicä baş popaz, angısı her yılın En ayoz erä girer kannan, ama diil kendi kanınnan.

²⁶ Başka türlü Ona lääzım olaceydı dünneyin kurulmasından çok sıra zeetlensin. Ama O şindi, vakıtların bitkisindä peydalandı, ki bir sıra herzamana Kendi kurbanınnan günahı silsin.

²⁷ Nicä insana sıralanmış, bir kerä ölsün, ondan sora daava,

²⁸ hep ölä Hristos da Kendini bir sıra kurban getirdi, ki çok insanın günahlarını taşısın. İkinci sıra gösterilecek, diil ki kurban olsun günah için, ama kurtarsın onnarı, kim Onu bekleer.