Çıfıtlara 7 - Enі Baalantı

Popaz Melkisedek

¹ Melkisedek, Salimin padişahı, En üüsek Allahın popazı, odur, kim karşı etti da iisözledi Avraamı, açan o geeri dönärdi, padişahları ensemektän sora.

² Avraam ona onuncu payını verdi hepsindän. Melkisedek ilkin kendi adı annamasına görä «dooruluk padişahı», sora «Salim padişahı» – annaması usluluk padişahı.

³ O bobasız-anasızdır, kiyatta gösterilmeer onun senselesi. Yok ne yaşlar başlantısı, ne dä yaşamanın bitkisi. O Allahın Oolu gibi kalêr popaz herzamana.

⁴ Görersiniz mi, nekadar üstün o? Artık dädumuz Avraam da ona verdi onuncu payını cenk gelirindän.

⁵ Zakona görä, Leviy oollarından onnar, kim popazlıkta izmet eder, alêrlar onuncu payını insandan, başka laflan, kendi kardaşlarından, makar ki bunnar da hep Avraamdan duuma.

⁶ Ama Melkisedek, ani diil Leviy oollarının senselesindän, aldı Avraamdan onuncu payını da iisözledi onu, kimä veriliydi Allahın adamakları.

⁷ Lafsız biliner, ani küçüünü iisözleer büük olan.

⁸ Leviyli popazlık kurulmasına görä onuncu payını alêr ölümnü insannar, ama Melkisedek popazlıına görä alêr o, kimin için şaatlık ediler, ani yaşêêr.

⁹ Çıkêr, eer bu laf dooruysa, ani Avraam verip onuncu payını, kendi Leviy dä verdi, angısı şindi insanın gelirindän onuncu payını alêr.

¹⁰ Zerä Leviy dedesinin güüdesindeydi, açan Melkisedek Avraamı karşı etti.

Eni popazlık

¹¹ İnsan kabletti Ayoz Zakonu leviyli popazlık sırasına görä. Ama eer etişäbileydilär tamannaa o popazlarlan, ne lääzımnık olaceydı enidän lafetmää başka bir popazın gelmesi için, angısı Melkisedek gibi, ama diil Aron gibi?

¹² Popazlık sırası diişilmesindä düşer zakon da diişilsin.

¹³ Aslısı O, Kimin için lafediler burada, çekilärdi başka bir tamızlıktan, angısından kimsey izmet etmedi kurbannıkta.

¹⁴ Zerä belli, ani bizim Saabi duudu İudanın tamızlıından, angısı için Moisey bişey sölämedi popazlık için.

¹⁵ Hem bu taa açık olêr, açan göreriz, ani Melkisedek gibi kalktı bir başka popaz,

¹⁶ Angısı oldu popaz diil bir senselä zakonuna görä, ama bir yaşamanın kuvedinä görä, angısı hiç bir sıra bilä yok edilmäz.

¹⁷ Zerä Onun için şaatlık ediler: «Sän divecinä popazsın Melkisedek gibi».

¹⁸ Ölä ki baştan verili sımarlamak diiştirildi, çünkü kuvetsiz hem faydasız oldu.

¹⁹ Zerä Zakon bişey yapamadı taman. Onun erinä verildi taa ii umut, angısınnan biz yaklaşêrız Allaha.

²⁰ Bu da olmadı eminsiz.

²¹ Leviylilär eminsiz popaz oldular, ama İisus popaz oldu Allahın emininnän, Angısı dedi Ona: «Emin etti Saabi da atılmayacek: Sän divecinä popazsın Melkisedek gibi».

²² Bununnan İisus taa ii bir baalantının garantiyası oldu.

²³ Bundan kaarä, popaz çok vardı, zerä ölüm beterinä yoktu nasıl olsun salt bir popaz.

²⁴ Ama İisus, çünkü divecinä yaşêêr, Onun popazlıı başkasına geçmäz.

²⁵ Onuştan O heptän kurtarabilir onnarı, kim Onun aracılıınnan Allaha yaklaşêr, zerä O herzaman yaşêêr da aracılık eder onnar için.

Eni baalantının Baş popazı

²⁶ Butürlü Baş popaz bizä lääzım. O ayoz, kabaatsız, lekesiz, günahkerlerdän ayırık hem hepsi göklerdän taa üüsek koyulu.

²⁷ Onun yok lääzımnıı, nicä öbür baş popazların, getirsin kurban kendi günahları için, sora insanın günahları için. O bir sıra herzaman için Kendini kurban getirdi.

²⁸ Zerä Zakon koyêr baş popaz o adamnarı, angıları yufka, ama emin, ani yapıldı Zakondan sora, koydu Oolu, Angısı taman oldu divecinä.