Çıfıtlara 4 - Enі Baalantı

Raatlık, ani Allah isteer versin insana

¹ Allahın adaması taa uzanêr, ki giräbilelim Onun raatlıına. Onuştan, sakınalım, ki birkimsey sizdän birtürlü bu raatlaa etişmesin.

² Zerä bizä dä verildi ii haber, nicä dä onnara, ama onnara fayda olmadı sözlerdän, ani işittilär, zerä kabletmedilär inannan.

³ Ama biz inancılar bu raatlaa gireriz, nicä O dedi: «Bän üfkeylän emin ettim, ani onnar girmeyeceklär Benim raatlııma», makar ki Onun işleri tamannanmıştı dünnä kurulmasından.

⁴ Zerä bir erdä edinci gün için bölä dedi: «Dinnendi Allah edinci günü hepsi Kendi işlerindän».

⁵ Da bunun için genä deer: «Onnar girmeyeceklär Benim raatlııma».

⁶ Ölä ki kimisi kaldı, girsinnär bu raatlaa, ama kimä öncä ii haber verildiydi, onnar girmedilär seslämemäk beterinä.

⁷ Onuştan O enidän kurêr bir gün, angısı «büün», açan Davidin aazınnan lafeder çok vakıttan sora, nicä öncä dendi: «Büün, eer işidärseniz Allahın sesini, inatlaştırmayın üreklerinizi».

⁸ Eer Yosua vereydi onnara raatlık, Allah taa sora lafetmeyeceydi bir başka gün için.

⁹ Onuştan kalêr taa bir vakıt, açan Allahın insanı dinnenecek.

¹⁰ Zerä o, kim girer Allahın raatlıına, o kendi dä dinnener kendi işlerindän, nicä Allah ta dinnendi Kendi işlerindän.

¹¹ Onuştan çalışalım bu raatlaa girmää, da kimsey olmasın seslämeyici onnar gibi.

¹² Zerä Allahın sözü diri, işleyän hem ikiüzlü kılıçtan taa keskin. O etişer orayı, neredä can hem duh, eklär hem imik biri-birindän ayırılêr, da daava eder ürään düşünmeklerini hem neetlerini.

¹³ Yaradılmışlardan hiç kimsey Allahtan saklanamaz. Onun gözlerinin önündä hepsi ayın-açık. Ona biz cuvap verecez.

İisus – Baş popazımız

¹⁴ Ölä ki, çünkü bizdä var bir şannı Baş popaz, ani geçti göklerdän, İisus, Allahın Oolu, kaavi tutunalım inandan, angısını şaatlık ederiz.

¹⁵ Bizdä var ölä bir Baş popaz, Angısı yok nasıl acımasın bizi zayıflıklarımızda, zerä O denenmiş oldu herbir iş üzerä bizim gibi, salt günah yapmadı.

¹⁶ Onuştan kıyışmaklan Allahın hayırlı çorbacılık skemnesinä yaklaşalım, ki kabledelim acıyannık hem hayır, yardım bulalım lääzımnıklı vakıtta.