Çıfıtlara 3 - Enі Baalantı

İisus hem Moisey

¹ Ölä ki, ayoz kardaşlarım, siz, ani bizimnän bilä gökä çaarıldınız, çevirin bakışınızı Apostola hem Baş popaza, Angısını şaatlık ederiz inanda, İisusa.

² İisus, nicä dä Moisey, bütün Allahın evindä inançtı Allaha, Kim koydu Onu bu izmetçilää.

³ Onuştan Allah uygun buldu, ani İisusa taa büük metinnik verilsin, nekadar Moiseyä, ölä nicä evi yapan taa çok hatırlanêr, nekadar ev.

⁴ Zerä herbir ev yapılı birkimseydän, ama hepsini yapan – Allahtır.

⁵ Hakına, ani Moisey «inançtı bütün Allahın evindä», nicä izmetkär, şaatlık etsin deyni o işlär için, ne sora haberleneceydi.

⁶ Ama Hristos, nicä Ool, inançtı Allaha Kendi evindä. Onun evi – biz, eer kıyışmaklan /bitkiyädän/ koruyarsak umudu, neylän üüneriz.

İnansızlaa düşmektän korunun

⁷ Onuştan, nicä Ayoz Duh deer: «Büün, eer işidirseniz Allahın sesini,

⁸ inatlaştırmayın üreklerinizi, benzämeyin dedelerinizä, angıları, baş kaldırıp, denedilär Onu çol erdä.

⁹ Orada denedilär Beni, baktılar annamaa aslısını Benim için, makar ki gördülär Benim yaptıklarımı kırk yıl.

¹⁰ Onuştan o boy insan darsıttı Beni, da bu beterä dedim: „Onnar herzaman şaşık ürekli adamnar, Benim yollarımı tanımadılar.

¹¹ Onuştan Bän üfkeylän emin ettim, ani onnar girmeyeceklär Benim raatlııma“».

¹² Kardaşlar, bakın, olmasın sizdän birisindä fena hem inansız bir ürek, angısı atılêr diri Allahtan.

¹³ Üreklendirin biri-birinizi her gün, okadar vakıt, nekadar dener «Büün», ki biriniz bilä inatlaştırmasın üreeni, aldanarak günahlan.

¹⁴ Çünkü olêrız paycı Hristozlan bilä, eer baştan bitkiyädän umudun temelini kaavi tutarsak.

¹⁵ Nicä öncä dedik: «Büün, eer işidirseniz Allahın sesini, inatlaştırmayın üreklerinizi dedeleriniz gibi, açan baş kaldırdılar».

¹⁶ Zerä kimdir onnar, kim işittiktän sora baş kaldırdı? Diil mi hepsi onnar, kim Moiseyin yardımınnan Mısırdan çıktılar?

¹⁷ Kimdi onnar, kim Onu kırk yıl darsıttı? Diil mi onnar, ani günaha girdilär da ölüp-düştülär çol erdä?

¹⁸ Kimin için O emin etti, ani girmeyeceklär Onun raatlıına? Diil mi onnar için, angıları seslämedilär?

¹⁹ Ölä ki, göreriz, ani onnar girämedilär inansızlık beterinä.