Çıfıtlara 10 - Enі Baalantı

Bitki kurban

¹ Ayoz Zakon, angısında var salt gelär iiliklerin gölgesi, ama diil hakına işlerin aslısı, hep o kurbannarlan, ani yıldan yıla durmamayca getiriler, yok nicä taman yapsın onnarı, kim Allaha yaklaşêr.

² Başka türlü durgunaceydılar kurbannarı getirmää, zerä onnar, kim izmet eder Allaha, bir kerä paklandıktan sora duymazdılar üreklerindä kendilerini günahker.

³ Ama bu kurbannar yıl yıldan insanın aklına getirer günahlarını.

⁴ Zerä yok nasıl bualar hem tekelär kanı günahı yok etsin.

⁵ Onuştan Hristos, gelip bu dünneyä, dedi Allaha: «Sän kurban hem baaşış istämedin, ama bir güüdä Bana hazırladın.

⁶ Heptän yakılan hayvannarı hem günah için kurbannarı Sän beenmedin.

⁷ Ozaman dedim: „Tä, gelerim, nicä Zakon kiyadında yazılı Benim için, ey, Allah, ki Senin istediini yapayım!“»

⁸ Hristos baştan dedi: «Ne kurbannarı, ne baaşışları, ne heptän yakılan hayvannarı, ne günah için kurbannarı Sän istämedin hem beenmedin, makar ki bunnar Zakona görä getiriler».

⁹ Sora ekledi: «Tä, gelerim, /ey, Allah,/ ki Senin istediini yapayım». İlkinkisini ortadan kaldırır, ki erinä ikincisini koysun.

¹⁰ Allahın bu istemesinä görä, biz ayozlandık bir sıra herzamana, açan İisus Hristos kurban getirdi Kendi güüdesini.

¹¹ Herbir popaz, gün gündän izmetçilik yaparak, çok sıra getirer hep o kurbannarı, angıları bir sıra bilä yok edämäz günahı.

¹² Ama O, Kendini getirip salt bir sıra kurban günahlar için, oturdu herzamana Allahın saa tarafına.

¹³ Şindän sora bekleer, duşmannarı koyulsun Onun ayakları altına.

¹⁴ Zerä O bir kurbannan taman yaptı herzamana onnarı, kim ayozlanmak yolunda.

¹⁵ Bunun için bizä şaatlık eder Ayoz Duh da, deyip:

¹⁶ «Tä, budur baalantı, ani o günnerdän sora onnarlan yapacam, deer Saabi: Benim zakonnarımı onnarın üreklerinä koyacam hem onnarın fikirlerinä yazacam.

¹⁷ Artık onnarın günahlarını hem zakonsuzluklarını aklıma getirmeyecäm».

¹⁸ Ama neredä günah afedilmiş, orada yok lääzımnık günah için kurban getirmää.

Brakılmayın inandan!

¹⁹ Ölä ki, kardaşlar, İisus Hristozun kanınnan var nasıl kıyışmaklan En ayoz erä eni hem diri yoldan girelim.

²⁰ Bu yolu O açtı bizä içyankı perdeylän, angısı Onun güüdesidir.

²¹ Bir büük Popazımız da var koyulu Allahın evinin üstünä.

²² Onuştan yaklaşalım Allaha pak üreklän hem kaavi inannan, serpip üzlerimizi, kötü neetlerdän paklayalım hem güüdemizi temiz suylan yıkayalım.

²³ Sallanmadık o umuttan tutunalım, angısı için şaatlık ederiz, zerä adamak verän inançtır.

²⁴ Çalışalım biri-birimizi havezlendirmää, ki sevgiylän iilik yapalım.

²⁵ Toplantılarımızdan brakılmayalım, nicä kimileri alıştı, ama okadar taa çok biri-birimizi üreklendirelim, nekadar taa çok görersiniz, ani o Gün yaklaştı.

²⁶ Zerä eer biz, kim aslılıı üürendi hem kabletti, isteyeräk günah yaparsak, ozaman başka bir kurban günahlarımız için kalmaz.

²⁷ Kalêr, salt korkuylan beklenilsin daava vakıdı hem kızgın ateş, ani yok edecek duşmannarı.

²⁸ Eer onnar, angıları Moiseyin zakonunu basardı, iki-üç kişinin şaatlıınnan acıyannıksız öldürülürsä,

²⁹ siz ne deersiniz? Nekadar taa büük ceza kabledecek o, kim Allahın Oolunu çiinemiş, baalantı kanını aşaalamış, neylän ayozlandıydı, da butakım Allahın hayırlı Duhunu gücendirmiş.

³⁰ Biz tanıyêrız Onu, Kim dedi: «Kin çıkarmak Benim işim, kötülüklär için Bän ödeyecäm, deer Saabi» hem «Saabi Kendi daava kesecek insanına».

³¹ Titsidir, düşäsin diri Allahın elinä!

³² Aklına getirin baştan vakıtları, açan aydınnıı gördüktän sora, çok savaşıp, acı çektiniz.

³³ Kimi kerä takazalanıp hem zeetlenip, aalemin gülüntüsü oldunuz. Kimi kerä pay aldınız onnarlan, angıları hep bu denemeklerdän geçirdilär.

³⁴ Siz acıdınız onnarı, kim kapanda bulundu; varlıınızın kayıplıını sevinmäklän kablettiniz, çünkü bilersiniz, ani /göktä/ taa ii hem geçmäz bir varlık edeneceniz.

³⁵ Ölä ki brakmayın girginniinizi, angısı için bir büük baaşış olacek.

³⁶ Sizä dayanmak lääzımdır, ki, tamannayıp Allahın istediini, kabledäsiniz, ne adanmış sizä.

³⁷ Zerä, nicä Allah deer Ayoz Yazıda, «az, pek az kaldı da Gelän gelecek, hiç oyalanmayacek.

³⁸ Benim dooru olannarım inannan yaşayaceklar, ama kim geeri çekiler, onnarı beenmäm».

³⁹ Biz diiliz onnardan, kim geeri çekiler da kaybeler, ama onnardan, kim inanêr da canını koruyêr.