Apokalіpsіs 9 - Enі Baalantı

¹ Beşinci angil trubayı baarttı, da gördüm bir yıldız, göktän erä düşük. Ona verildi anatar dipsizlik pınarından.

² O açtı dipsizlik pınarını, da oradan kalktı tütün, bir büük fırından gibi. Bu pınarın tütünündän gün hem hava karardı.

³ Tütün içindän er üstünä çekirgelär çıktılar. Onnara verildi kuvet, nicä kuvet, ani var erdeki skorpionnarda.

⁴ Onnara sımarlandı kederlämesinnär erdeki otları hem hiç bir eşillii eki fidanı, ama salt insannarı, angıların annılarında yok Allahın mühürü.

⁵ Çekirgelerä verildi kuvet, diil ki öldürsünnär insannarı, ama beş ay zeetlesinnär. Onnarın zeeti benzärdi o acıya, açan skorpion insanı dalêêr.

⁶ O günnerdä insannar aarayacek ölümü, ama bulamayaceklar. İsteyeceklär ölsünnär, ama onnardan ölüm kaçacek.

⁷ Çekirgelerin görünüşü benzärdi cenk için hazırlanmış beygirlerä. Başlarında vardı feneţlär, sansın altından, ama üzleri benzärdi insan üzünä.

⁸ Saçları benzärdi karı saçlarına, dişleri dä aslan dişleri gibiydi.

⁹ Güüslerindä vardı zirh, sansın demirdän zirh, da kanatlarının uultusu benzärdi çok cenk arabası sesinä, koşulu beygirlärlän, ani cengä giderlär atılama.

¹⁰ Onnarın kuyrukları hem iineleri, nicä skorpionnarın. Onnarın kuvedi kuyruklarındadır, ki zeetlesinnär insanı.

¹¹ Onnarın üstünä padişah odur, kim dipsizliin angili, kimä çıfıtçasına dener Avaddon, ama urumcasına Apollion.

¹² Bir bela geçti, te, taa iki bela ardına geler.

¹³ Altıncı angil trubayı baarttı, da işittim bir ses altın altarın dört buynuzundan, ani bulunêr Allahın önündä.

¹⁴ O ses, altıncı angilä, ani trubayı tutardı, dedi: «Salver dört angili, angıları baalı büük Evfrat deresindä».

¹⁵ Dört angil salverildi, angıları hazırlanmıştılar o saat, o gün, o ay hem o yıl için, ki öldürsünnär üçüncü payını insandan.

¹⁶ Atlı askerlerin sayısı vardı irmi bin kerä on bin. Onnarın sayısını işittim.

¹⁷ Tä nesoy gördüm görümdä beygirleri hem üstündä atlıları. Onnarın güüslerindä zirhlär vardı ateş, gök yakut hem kükürt rengindä. Beygirlerin kafaları benzärdi aslan kafasına, da aazlarından çıkardı ateş, tütün hem kükürt.

¹⁸ İnsandan üçüncü payı öldü bu üç beladan – ateştän, tütündän hem kükürttän, ani çıkardı onnarın aazlarından.

¹⁹ Beygirlerin kuvedi aazlarında hem kuyruklarında. Zerä kuyrukları, angılarında var kafalar, benzär yılana, da bunnarlan insanı zeetlärdilär.

²⁰ Kalan insannar, ani öldürülmedilär bu belalardan, dönmedilär Allaha kendi ellerinin yaptıklarından. İleri dooru baş iilttilär cinnerä hem altın, gümüş, tunç, taş hem aaçtan idollara, angıları görämeerlär, işidämeerlär hem gezämeerlär.

²¹ Onnar dönmedilär adam öldürmektän, büü yapmaktan, orospuluktan hem hırsızlıktan.