Apokalіpsіs 7 - Enі Baalantı

Mühürlenmiş 144000 insan

¹ Bundan sora gördüm dört angil, angıları durardılar erin dört tarafında da tutardılar erin dört lüzgerini, ki lüzgär esmesin ne er üstünä, ne deniz üstünä, ne dä bir aaç üstünä.

² Sora gördüm başka bir angil, kim kalktı günduusundan, angısında vardı diri Allahın mühürü. O baardı büük seslän dört angilä, angılarına izin veriliydi, kederlesinnär eri hem denizi, deyip:

³ «Kederlämeyin ne eri, ne denizi, ne dä fidannarı, biz Allahımızın çıraklarının annılarına mühür koymayınca!»

⁴ Bän işittim mühürlü olannarın sayısını: mühürlü oldu üz kırk dört bin, hepsi İzrail oollarının tamızlıklarından.

⁵ Mühürlü oldu İudanın tamızlıından – oniki bin, Ruvimin tamızlıından – oniki bin, Gadın tamızlıından – oniki bin,

⁶ Asirin tamızlıından – oniki bin, Neffalimin tamızlıından – oniki bin, Manassiyanın tamızlıından – oniki bin,

⁷ Simeonun tamızlıından – oniki bin, Leviyin tamızlıından – oniki bin, İssaharın tamızlıından – oniki bin,

⁸ Zevulonun tamızlıından – oniki bin, İosifin tamızlıından – oniki bin, Veniaminin tamızlıından – oniki bin.

⁹ Ondan sora baktım da gördüm bir büük sürü insan, angılarını kimsey yoktu nasıl saysın, hertürlü millettän, senseledän, halktan hem dildän, angıları durardılar çorbacılık skemnesinin hem Kuzunun önündä, biyaz rubalarlan giiyimni hem hurma dalları ellerindä.

¹⁰ Onnar büük seslän baarardılar: «Kurtulmak bizim Allahtan, Kim oturêr çorbacılık skemnesindä, hem Kuzudan!»

¹¹ Hepsi angillär durdular çorbacılık skemnesinin, aksakalların hem dört yaratıın dolayında, üzükoynu düştülär çorbacılık skemnesinin karşısında da baş iilttilär Allaha, deyeräk:

¹² «Amin! İi söz, metinnik, aariflik, şükür, ikram, kudret hem kuvet olsun bizim Allaha diveçtän divecä! Amin!»

¹³ Birisi aksakallardan, danışıp bana, sordu: «Bunnar, ani giiyimni biyaz rubalarlan, kimdir onnar hem neredän geldilär?»

¹⁴ «Çorbacı, – cuvap ettim bän, – sän bilersin». O dedi bana: «Bunnar o büük zeettän geçip-gelennär. Onnar rubalarını yıkadılar hem Kuzunun kanınnan biyazlattılar.

¹⁵ Onuştan onnar bulunêrlar Allahın çorbacılık skemnesinin karşısında da izmet ederlär Ona gecä-gündüz Onun Ayoz binasında. Çorbacılık skemnesindä Oturan çadırını onnarın üstünä gerecek.

¹⁶ Onnar şindän sora acıkmayacek hem susamayacek, güneş onnarı çarpmayacek, ne dä bir başka kızgınnık.

¹⁷ Zerä Kuzu, ani bulunêr çorbacılık skemnesinin ortasında, onnarı güdecek da götürecek yaşamak suyunun sızıntılarına. Allah silecek her yaşı onnarın gözlerindän».