Apokalіpsіs 19 - Enі Baalantı

Sevinmelik göktä

¹ Ondan sora bir büük ses işittim göktä, nicä çok insan kalabalıı, ani deyärdi: «Aliluya, kurtarmak, metinnik, ikram hem kuvet bizim Allaha!

² Zerä aktır hem doorudur Onun daavaları. Çünkü O daava yaptı büük orospu karıya, kim bütün eri orospuluunnan hayırsızlaa götürdü. Ona ceza verdi kendi çıraklarının kannarı için, ani onun elindän döküldü».

³ Sora ikinci sıra dedilär: «Aliluya! Orospu karının tütünü kalkêr yukarı diveçtän divecä!»

⁴ Ozaman irmi dört aksakal hem dört yaratık kapandılar da baş iilttilär Allaha, Kim otururdu çorbacılık skemnesindä, deyip: «Amin! Aliluya!»

⁵ Çorbacılık skemnesindän işidildi bir ses, ani deyärdi: «Metinneyin bizim Allahı siz, hepsi Onun çırakları, küçük-büük, ani Ondan korkêrsınız!»

⁶ Sansın çok insan kalabalıın sesini işittim, nicä çok sular uultusu, büük gök gürültülerinä benzär, ani deyärdi: «Aliluya, bizim Saabi Allah, Çokkudretli, başladı padişahlık etmää.

⁷ Sevinelim hem şennenelim, metinnik Ona verelim, zerä Kuzunun düün vakıdı geldi, da gelini kendini hazırladı.

⁸ Gelinä verildi, giinsin, temiz, yalabık incä keten rubalar». İncä keten rubalar – Allahın ayoz halkının dooru işleri.

⁹ Angil dedi bana: «Yaz, ne mutlu teklif edilmişlär Kuzunun düününä!» Sora dedi bana: «Bunnar hakına sözlär – Allahın sözleri!»

¹⁰ Bän düştüm onun ayaklarına, ki ona baş iildeyim, ama o dedi bana: «Sakın, bunu yapma, bän kafadarım sana hem senin kardaşlarına, angıları şaatlık ederlär İisus için. Allaha baş iilt, zerä İisus için şaatlık – prorokluk duhu».

Atlı biyaz beygir üstündä

¹¹ Sora gördüm açılmış gökü, da tä, bir atlı biyaz beygir üstündä. Adı Onun «İnanç» hem «Hak», Kim dooru daava yapêr hem cenk eder.

¹² Gözleri ateş yalını gibi, başında var çok korona. Bir ad Onda yazılıydı, ani kimsey bilmeer, ondan kendisindän kaarä.

¹³ O giiyimniydi rubaylan, ani kana daldırılmış. Onun adı – Allahın Sözü.

¹⁴ Gökteki askerlär Onun ardına yollandılar biyaz beygirlärlän atlı hem temiz hem biyaz incä keten rubalarlan giiyimni.

¹⁵ Onun aazından bir bilenik kılıç çıkêr, ki onunnan milletleri düüsün, da Kendisi bir demir bastonnan güdecek onnarı. Kendisi dä çiineyecek şarapanayı, neredä yapılêr Allahın, Çokkudretlinin, kızgın üfkesinin şarabı.

¹⁶ Onun rubası hem çantısı üstündä bir adı var yazılı: «Padişahların Padişahı hem Saabilerin Saabisi».

¹⁷ Gördüm bir angil, ani dururdu gündä da büük seslän baardı hepsi kuşlara, ani uçardılar gök ortasında: «Uçun, toplanın Allahın büük sofrasına,

¹⁸ ki iyäsiniz ölü padişahların, asker zaabitlerinin hem kudretli adamnarın etini, beygirlerin hem atlıların etini, serbest hem çırak, küçük hem büük, herkezin etini!»

¹⁹ Gördüm canavarı hem dünnä padişahlarını hem onnarın askerlerini, angıları toplandılar, ki cenk etsinnär Onunnan, Kim atlı beygir üstündä hem Onun askerinnän.

²⁰ Canavar hem yalancı prorok, ani yapardı meraklı nışannar canavarın önündä, tutuldular. Yalancı prorok bu nışannarlan aldattı onnarı, kim kablettiydi canavarın damgasını hem kim baş iildärdi canavarın idoluna. İkisi dä diridän atıldılar ateş gölünä, ani kükürtlän yanêr.

²¹ Ama kalanı öldürüldü kılıçlan, ani beygir üstündä atlının aazından çıkardı. Hepsi kuşlar onnarın etindän doyundular.