Apokalіpsіs 17 - Enі Baalantı

Orospu karı kızıl canavar üstündä

¹ Edi angillerdän birisi, angılarında vardı edi çölmek, geldi da lafetti benimnän: «Gel, – dedi, – gösterecäm sana, nicä daava yapılêr büük orospu karıya, ani çok sular üstündä oturêr».

² Erin padişahları onunnan orospuluk ettilär. Onun orospuluk şarabınnan erdä yaşayannar sarfoş oldular.

³ Angil duhlan beni bir çol erä götürdü, da gördüm bir karı, ani oturêr kızıl canavar üstündä. Bu canavar doluydu adlarlan, angılar kötülärdi Allahı, da onun vardı edi kafası hem on buynuzu.

⁴ Bu karı ergivan hem koyu kırmızı renkli rubaylan giiyimni, altınnan, paalı taşlan hem takım sedeflän donaklıydı. Elindä tutardı bir altın oka, dolu kendi orospuluunun iirenç hem mındar işlerinnän.

⁵ Annısında yazılıydı bir ad, angısının var saklı annaması: «Büük Vavilon, orospuların hem erdeki iirençliklerin anası».

⁶ Gördüm, ani bu karı sarfoş olmuştu Allahın ayoz halkı kanından, İisusun şaatları kanından. Sarp şaştım, açan onu gördüm.

⁷ Angil bana sordu: «Neçin şaşêrsın? Bän annadacam sana saklı annamayı bu karı için hem canavar için, ani onu taşıyêr, hem angısında var edi kafa hem on buynuz.

⁸ Canavar, angısını gördün, öncä vardı, ama şindi yok. O dipsizliktän çıkacek da kayıplaa gidecek. Erdä yaşayannar, kimin adları dünneyin kurulmasından diil yazılı yaşamak kiyadında, şaşaceklar, görüp canavarı, ani öncä vardı, şindi yok, ama genä gelecek.

⁹ Bunu annamak için aariflik lääzım. Edi kafa – edi bayır, angıların üstündä oturêr karı, hem edi padişah.

¹⁰ Onnardan beşi düştü, biri var, ama öbürü taa gelmedi. Açan da gelecek o, lääzım az vakıt kalsın.

¹¹ Canavar, ani öncä vardı, ama şindi yok, o sekizinci padişah hem edisindän biri, ani kayıplaa gider.

¹² On buynuz, ani gördün – on padişah, angıları taa kabletmedilär padişahlıı, ama padişah zaabitliini kabledeceklär bir saada canavarlan barabar.

¹³ Onnarda hepsindä var bir neet, da kendi kudretlerini hem zaabitliklerini canavara vereceklär.

¹⁴ Onnar Kuzuylan cenk edeceklär, ama Kuzu onnarı enseyecek, zerä Odur saabilerin Saabisi hem padişahların Padişahı, hem kim Onunnan barabar, onnar çaarılmış, seçilmiş hem inanç».

¹⁵ Sora angil dedi bana: «Sular, angıları sän gördün, neredä oturêr orospu, – halklar, topluluklar, milletlär hem dillär.

¹⁶ On buynuz hem canavar, ani gördün, onnar orospu karıdan azetmeyeceklär da onu yalnız hem çıplak brakaceklar. Onun etindän iyeceklär da ateştä yakaceklar onu.

¹⁷ Çünkü Allah koydu üreklerinä, yapsınnar Onun istediini da bir neettä kayıl olsunnar canavara vermää kendi padişahlıklarını, Allahın sözü tamannanınca.

¹⁸ Karı, ani gördün, o – büük kasaba, ani erin padişahları üstünä padişahlık eder».