Apokalіpsіs 16 - Enі Baalantı

Allahın üfkesi hem edi çölmek

¹ İşittim Ayoz bina içindän bir büük ses, ani dedi edi angilä: «Gidin da edi çölmektän dökün er üstünä Allahın kızgınnıını!»

² İlk angil gitti da döktü onun çölmeendän er üstünä. Peydalandı titsi hem acı yaralar insannarda, kimdä vardı canavarın damgası hem kimnär baş iildärdilär onun idoluna.

³ İkinci angil döktü çölmeeni deniz üstünä, da su ölü kanı gibi oldu. Hepsi, ne yaşêêr deniz içindä, öldü.

⁴ Üçüncü angil döktü çölmeeni akar sular üstünä hem su sızıntıları üstünä, onnar da kan gibi oldular.

⁵ İşittim su angilini, kim deyärdi: «/Saabi,/ ani varsın, vardın hem ayozsun, Sän dooru yaptın, ani bölä daava kestin.

⁶ Zerä onnar döktülär Senin ayoz halkının hem proroklarının kanını, da Sän verdin onnara kan, içsinnär. Onnara bu yaraşêr».

⁷ İşittim bir ses kurbannıktan, ani deyärdi: «Ölä, Saabi Allah, Çokkudretli, hakına hem dooru Senin daavaların».

⁸ Dördüncü angil döktü çölmeeni günün üstünä. İzin verildi günä, yaksın insannarı kızgınnıınnan.

⁹ İnsannar kauruldular titsi sıcaktan. Onnar kötülärdilär Allahın adını, Kimin bu belalar üstünä vardı zaabitlii, ama günahlarından Allaha dönmedilär hem Onu metinnämedilär.

¹⁰ Beşinci angil döktü çölmeeni canavarın çorbacılık skemnesi üstünä, da onun padişahlıı karannıklandı. İnsannar acıdan dillerini dalardılar.

¹¹ Onnar gökteki Allahı kötüledilär acıları hem yaraları beterinä, ama kendi yaptıklarından dönmedilär.

¹² Altıncı angil döktü çölmeeni büük derä Evfrat üstünä da onun suyu kurudu, ki yol hazırlansın günduusundan padişahlara.

¹³ Gördüm, ani drakonun aazından, canavarın aazından hem yalancı prorokun aazından çıktı üç fena duh, kurbaalara benzär.

¹⁴ Bunnar cin duhları, angıları meraklı nışannar yapêrlar. Onnar çıkêrlar bütün dünnä padişahlarına, ki toplasınnar onnarı bireri cenk etmää Allahın, Çokkudretlinin, o büük günündä.

¹⁵ «Tä, Bän gelerim, bir hırsız gibi! Ne mutlu, kim uyanık durêr hem hazır tutêr kendi rubalarını, ki çıplak gezmesin da ayıplıı görünmesin!»

¹⁶ O duhlar padişahları topladılar bir erä, ani çıfıtçasına dener Armageddon.

¹⁷ Edinci angil döktü kendi çölmeeni havaya, da /gökteki/ Ayoz binadan /Allahın/ çorbacılık skemnesindän işidildi bir büük ses, ani dedi: «Tamannandı!»

¹⁸ Ozaman çimçirik çaktı, uultular işidildi, gök gürledi, da oldu ölä büük er tepremesi, nicä olmadıydı nezamandan insan bu er üstündä. Ölä büük er tepremesi oldu!

¹⁹ Büük kasaba üç paya bölündü da milletlerin kasabaları yıkıldı. Büük Vavilon anıldı Allahın önündä, da ona verildi filcan, ani tutêr Allahın kızgın üfkesinin şarabını.

²⁰ Hepsi adalar kaçıp yok oldular hem bayırlar kaybeldilär.

²¹ Göktän insan üstünä tolu yaadı. Herbir tolunun aarlıı bir talant kadardı. Tolu belası ölä korkunçtu, ki insan kötülärdi Allahı bu belanın beterinä.