Apokalіpsіs 13 - Enі Baalantı

Edi kafaylan hem on buynuzlan canavar

¹ Ozaman gördüm, denizdän çıkarkan, bir canavar on buynuzlan hem edi kafaylan. Buynuzlarında vardı on korona hem kafalarında Allahı kötüleyän adlar.

² Canavar, ani gördüm, barsa benzärdi. Onun bacakları ayı bacakları gibiydi, aazı sa nicä aslan aazıydı. Drakon ona kendi kudredini, çorbacılık skemnesini hem büük zaabitlii verdi.

³ Onun kafalarından biri sansın yaralıydı da ölüm atimindeydi, ama bu ölüm yarası alıştı, da bütün dünnä şaşarak gitti canavarın ardına.

⁴ Onnar baş iilttilär drakona, zerä o zaabitlik verdi canavara. Sora baş iilttilär canavara, deyeräk: «Kim canavar gibi, kim cenk edäbilir ona karşı?»

⁵ Verildi ona bir aaz, ani sölärdi şişkin sözlär hem kötü laflar. Verildi zaabitlik, ki kırk iki ay işlesin.

⁶ O aazını açtı da başladı Allahı kötülemää. Kötüledi Onun adını hem ayoz çadırını – göktä yaşayannarı.

⁷ Verildi izin, ayozlarlan cenk yapsın da ensesin onnarı. Onun zaabitlii oldu herbir tamızlık, halk, dil hem millet üstünä.

⁸ Hepsi yaşayannar er üstündä ona baş iildecek, kimin adları dünneyin kurulmasından buazlanmış Kuzunun yaşamak kiyadında diil yazılı.

⁹ Kimin var kulaa, ko işitsin!

¹⁰ Kim lääzım esirlää gitsin, esirlää gidecek, kim lääzım kılıçlan öldürülsün, kılıçlan öldürülecek. Bu halda Allahın ayoz halkı lääzım olsun sabur hem inanç.

Canavar iki buynuzlan

¹¹ Sora gördüm bir başka canavar, ani çıkardı er içindän. Onda vardı iki buynuz, benzär kuzu buynuzlarına, ama lafedärdi drakon gibi.

¹² O işlärdi hep o zaabitliklän, angısınnan ilk canavar da işlärdi, ki er hem erdä yaşayannar baş iiltsinnär ilk canavara, angısının ölüm yarası alıştı.

¹³ Okadar büük nışannar yapardı, ani ateş göktän erä insanın önündä yaadırardı.

¹⁴ Erdä yaşayannarı aldadardı bu nışannarlan, ani verili ona yapsın canavarın önündä, da erdä yaşayannara sölärdi, yapsınnar bir idol canavar için, angısı kılıçtan yaralandı, ama saa oldu.

¹⁵ Ona izin verildi, ki canavarın idoluna soluk versin, canavarın idolunu lafettirsin hem sımarlasın, ki öldürülsün hepsi, kim baş iiltmeer canavarın idoluna.

¹⁶ O yapardı, ani küçük-büük, zengin-fukaara, serbest-çırak olsun, hepsinä damga saa elinä yada annısına koyulsun,

¹⁷ ki kimsey satamasın hem alamasın bişey, kimdä yok bu damga, ani canavarın adı yada onun adının sayısı.

¹⁸ Bu halda lääzım aariflik. Kimin var fikiri, saysın canavarın sayısını, zerä o – insan sayısı. Onun sayısı: altı üz altmış altı.