Apokalіpsіs 10 - Enі Baalantı

Angil bir küçük kola elindä

¹ Sora gördüm başka bir kaavi angil, kim inärdi göktän, sarılı bulutlan, da başı üstündä bir gök kuşaa vardı. Üzü gün gibi, ayakları da ateştän direklär gibiydi.

² Elindä tutardı açık bir küçük kiyat kolası. Saa ayaanı bastı deniz üstünä, sol ayaanı da er üstünä,

³ sora baardı büük seslän, nicä baarêr bir aslan. Açan o baardı, edi gök gürültüsü kendi seslerinnän cuvap etti.

⁴ Açan edi gök gürültüsü gürüldedi, bän istedim yazmaa, ama işittim bir ses göktän, ani dedi bana: «Tut saklı, ne edi gök gürültüsü dedi, da yazma bu sözleri».

⁵ Ozaman angil, angısını gördüm durarkan deniz üstündä hem er üstündä, kaldırdı saa elini gökä

⁶ da emin etti diveç Yaşayanın adınnan, Kim yarattı gökü hem ne var göktä, eri hem ne var erdä, denizi hem ne var denizdä, deyip: «Oyalanmak şindän sora olmayacek.

⁷ Ama ozaman, açan edinci angil truba baardacek, tamannanacek Allahın saklı neeti, nicä haberlediydi kendi çıraklarına, proroklara».

⁸ O ses, ani işittiydim göktän, enidän lafetti benimnän da dedi: «Git, al açık küçük kolayı angilin elindän, angısı durêr deniz hem er üstündä».

⁹ Gittim angilä da dedim, versin bana küçük kolayı. O dedi bana: «Al da i onu, karnında acı, ama aazında bal gibi tatlı olacek».

¹⁰ Aldım küçük kolayı angilin elindän da idim. Aazımda bal gibi tatlıydı, ama idiktän sora karnım acılıklan doldu.

¹¹ Sora dendi bana: «Sän enidän lääzım prorokluk edäsin çok halklar, milletlär, dillär hem padişahlar için».