3 İoanın 1 - Enі Baalantı

Seläm

¹ Bän, presviter, seläm yollêêrım sevgili Gaya, angısını bän hakına severim.

² Sevgili kardaşım! Dua ederim, ki saa olasın, hem hepsi işlerin ii gitsin, nicä senin canın da ii gider.

³ Zerä bän pek sevindim, açan geldi kardaşlar da şaatlık ettilär, ani sän aslılıkta yaşêêrsın hem aslılık yolunda gezersin.

⁴ Benim için yok taa büük sevinmäk, nekadar işideyim, ani uşaklarım aslılık yolunda gezerlär.

Nasaatlar

⁵ Sevgili kardaşım! Sän ii iş yapêrsın, açan yardım edersin kardaşlara, makar ki onnar – yabancı.

⁶ Onnar şaatlık ettilär klisenin önündä senin sevgin için. Sän ii yapacan, eer onnarı yola yollarsan, nicä düşer Allahın önündä.

⁷ Zerä onnar yola yollandılar Hristozun adı için, almayarak bir dä yardım inansızlardan.

⁸ Onuştan bölä insannarı lääzım kabledelim, ki barabar işleyelim aslılık için.

⁹ Bän yazdım kliseyä, ama Diotref, ani sever öncü olmaa, kabletmeer bizi.

¹⁰ Onuştan, açan gelecäm, onun aklına getirecäm, ne o yapêr, zerä kötü laflarlan bizi karalêêr, hem diil sade bunu yapsın, ama kabletmeer kardaşları hem dä köstek koyêr onnara, kim isteer kabletsin, hem onnarı klisedän koolêêr.

¹¹ Sevgili kardaşım, benzämä kötülää, ama iilää. Kim yapêr iilik, o Allahtan. Kim yapêr kötülük, o görmedi Allahı.

¹² Dimitri için hepsi ii şaatlık eder, da hakına o ölä dä yaşêêr. Biz dä onun için şaatlık ederiz, da bilersiniz, ani bizim lafımız dooru.

¹³ Çok işlär için isteerim yazmaa, ama istämeerim çernilaylan hem saazlan sizä yazayım.

¹⁴ Umutlanêrım, tezdä görüşeyim seninnän da lafedeyim üz-be-üz.

¹⁵ Selemet sana. Seläm yollêêr sana dostlar. Adınca seläm sölä hepsi dostlara. /Amin./