2 Tіmofeyä 4 - Enі Baalantı

¹ Eminneerim seni Allahın hem Saabi İisus Hristozun önündä, Angısı daava kesecek dirilerä hem ölülerä, zerä O, gelip, padişahlık edecek.

² Allahın sözünü haberlä, herzaman çalış bu iştä, ii vakıtta hem zor vakıtta. İnandır, takazala, üreklendir, üürederäk bütün saburluklan.

³ Zerä vakıt gelecek, açan saa üüretmeklerä dayanamayaceklar, ama yannarına toplayaceklar üüredicileri kendi istediklerinä görä, ki nazlandırsınnar onnarı.

⁴ Kulaklarını tıkayaceklar, ki seslämesinnär aslılıı, yoldan saparak, masallara davranaceklar.

⁵ Ama sän herbir iş üzerä kuşku ol, zeetlerä dayan, İi Haberi nasaat et, izmetçiliini tamanna.

⁶ Zerä şindän sora benim kanım dökülecek, nicä şarap kurbanın üstünä, benim için geçinmäk vakıdı yaklaştı.

⁷ İi savaşta düüştüm, yarışı bitirdim, inanı korudum.

⁸ Şindän sora bana hazır durêr dooruluk feneţi, ani Saabi, Dooru Daavacı, o Gündä verecek bana, diil sade bana, ama hepsinä, kim özlemäklän bekleer Onun gelmesini.

Pavlinin kendi istemekleri hem selämneri

⁹ Nekadar tez çalış bana gelmää.

¹⁰ Zerä Dimas beni braktı, çünkü taa çok sevdi bu dünneyi da gitti Salonik kasabasına. Kriskis gitti Galatiyaya, Tit – Dalmatiyaya.

¹¹ Salt bir Luka kaldı benimnän. Al Markı da getir seninnän, zerä o bana yardımcı olar izmettä.

¹² Bän Tihiki yolladım Efes kasabasına.

¹³ Açan gelecän, getir yaamurluu, ani braktım Troada kasabasında Karpın evindä. Getir kiyatları, ayırı, pergamentleri.

¹⁴ Bakırcı Aleksandru çok fenalık bana yaptı. Saabi ödesin onun işlerinä görä!

¹⁵ Sän dä sakın ondan, zerä çok karşı durdu bizim sözlerimizä.

¹⁶ İlk korunmak lafımda kimsey benim tarafımda kalmadı, hepsi beni braktı. Bunun için onnardan esap sorulmasın!

¹⁷ Ama Saabi benim yanımdaydı, O beni kaaviledi, ki nasaat işi tamannansın benim aazımnan, da hepsi milletlär onu işitsinnär. Bölä aslanın aazından kurtuldum.

¹⁸ Saabi beni hertürlü kötülüktän kurtaracek da Kendi Gökteki Padişahlıı için koruyacek. Ona metinnik diveçtän divecä! Amin.

¹⁹ Seläm ver Priskillaya hem Akilaya hem Onisiforun evdekilerinä.

²⁰ Erast kaldı Korinf kasabasında. Trofimi hasta braktım Milit kasabasında.

²¹ Çalış kıştan öncä bana gelmää. Seläm sana verer Evvul, Pudens, Lin, Klavdiya hem hepsi kardaşlar.

²² Saabi /İisus Hristos/ olsun senin duhunnan. Sizinnän iivergi olsun. /Amin./