2 Tіmofeyä 3 - Enі Baalantı

Bitki günnär

¹ Biläsin, ani bitki günnerdä zor vakıtlar olacek.

² Zerä insan olacek kendini sevän, parayı sevän, üünän, hodul, kötüleyici, anayı-bobayı seslämeyän, şükürsüz,

³ ayozluk hem sevgi nedir bilmeyän, uzlaşmayan, fitleyici, zapsız, azgın, iilik duşmanı,

⁴ hayın, fikirsiz, şişkin, taa çok sefa sevennär, nekadar Allahı.

⁵ Kendilerini göstererlär sansın Allahın yolunda, ama yolun kuvedini inkär ederlär. Butürlü insannardan uzak dur.

⁶ Onnardan kimileri evlerä sokulêr da sansın esir alêrlar zavallı karıları, ani günahlan üklü hem türlü havezlärlän sürüklener,

⁷ ani dayma üürenerlär, ama hiç birzaman etişämeerlär tanısınnar aslılıı.

⁸ Nicä Yannis hem Yambris Moiseyä karşı kalktılar, hep ölä bunnar da aslılaa karşı durêrlar. Onnar – bozuk fikirli, inan için ret edilmiş insannar.

⁹ Ama onnar çok ilerlämeyeceklär, zerä onnarın akılsızlıını herkezi açık görecek, nicä oldu Yannisin hem Yambrisin akılsızlıı.

Timofeyä bitki nasaatlar

¹⁰ Ama sän yakından izledin benim üüretmemi, yaşamamı, neetlerimi, inanımı, saburluumu, sevgimi, dayanmamı,

¹¹ koolamakları hem zeetleri, ani başıma geldi Antiohiya, İkoniya hem Listra kasabalarında. Ne koolamaklar geçirdim! Ama hepsindän Saabi kurtardı.

¹² Hepsi, kim isteer gitmää Allahın yolunda, inanarak İisus Hristoza, onnar koolanmış olaceklar.

¹³ Kötü insannar hem şarlatannar kötülüktä gittikçä ilerleyeceklär, başkalarını aldadarak, kendileri dä aldanarak.

¹⁴ Ama sän tutun o işlerdän, ne üürendin hem ne sana inandırıldı, zerä bilersin, kimdän üürendin.

¹⁵ Sän Ayoz Yazıları küçüklüündän bilersin. Onnar var nicä aarifletsinnär seni, ki kurtulasın inannan İisus Hristoza.

¹⁶ Hepsi Ayoz Yazılar esilmiş Allahtan hem faydalı, ki üüretsinnär, takazalasınnar, düzeltsinnär, sınaştırsınnar dooru olmaa,

¹⁷ ki Allahın adamı olsun taman hem hertürlü ii iş yapmaa hazır.