2 Korіnflіlerä 9 - Enі Baalantı

Fukaara inancılara yardım

¹ Allahın ayoz halkına yardım etmäk için zeedä olacek, ki sizä yazayım.

² Bilerim, ani havezsiniz yardım etmää, bununnan üünerim makedoniyalıların önündä. Onnara dedim, ani siz ahayalılar geçän yıldan beeri hazırsınız bu işi yapmaa. Sizin çalışkannıınız onnardan çoyunu havezlendirdi.

³ Hep okadar yolladım kardaşları, ki üünmemiz sizinnän bu sefer naafilä olmasın, da nicä söledim, olasınız hazır.

⁴ Ölä ki, eer Makedoniyadan kimi adamnar benimnän gelirseydilär da sizi hazır bulmarsaydılar, biz – demeyelim siz! – utanmış kalmayalım, ani bukadar kıyışmaklan üündüm sizinnän.

⁵ Onun için sandım, ani lääzım yalvarayım kardaşlara, onnar öncä gitsinnär sizä da hazırlasınnar bu hayırlı baaşışınızı, ne siz adadınız, ki baaşışınız hazır olsun cömertliktän, ama diil sıkılıktan.

⁶ Unutmayın: kim az eker, az biçer, kim çok eker, çok da biçer.

⁷ Herkezi baaşlasın okadar, nekadar üreendä neetledi, diil gücenmäklän hem zorlan. Zerä Allah sever onnarı, kim gülümseyeräk verer.

⁸ Allah kaaviydir, ki zenginnetsin sizi herbir iivergiylän, da sizdä herzaman hepsi etär olsun, hem cömertliklän katılasınız herbir ii işä.

⁹ Nicä yazılı: «Baaşış daattı, verdi fukaaralara, onun dooruluu divecä kadar kalêr».

¹⁰ Kim toom verer ekiciyä hem ekmek, isin deyni, O sizä dä toom verecek, çoklandıracek, ne ekäsiniz hem zeedeleyecek dooruluunuzun berekedini.

¹¹ Ölä, ki her taraftan zenginneyeceniz, ki cömert olabiläsiniz her iştä, da baaşışlar, ani bizim elimizlän yollêêrsınız, Allaha şükürlük getirsin.

¹² Zerä bu yardım, bu izmetçiliiniz diil sade Allahın ayoz halkının yokluklarını dolduracek, ama başka taraftan da zenginnedecek, çünkü çok insan Allaha şükür edeceklär.

¹³ Çünkü sizin izmetçiliiniz gösterecek aslılıınızı, onnar da Allahı metinneyeceklär, görüp, ani aslı yaşêêrsınız Hristozun İi Haberinä görä, angısını açık kablettiniz, hem ani cömertliklän paylaşêrsınız onnarlan hem herkezinnän onu, ne var sizdä.

¹⁴ Onnar, özleyeräk sizi, sizin için dua ederlär, çünkü Allah taşkınnıktan sizä iivergi verdi.

¹⁵ Şükürlük olsun Allaha büük baaşışı için, angısını hiç yok nasıl annatmaa!