2 Korіnflіlerä 10 - Enі Baalantı

Pavli doorulêêr izmetçiliini

¹ Bän, Pavli, ani usluyum aranızda, ama kıyakım sizdän uzak olarak, yalvarêrım İisus Hristozun münüzlüünnän hem yalpaklıınnan

² hem isteerim, ki açan gelecäm, lääzım olmasın, ki kıyak olayım bir kıyışmaklan hem girginniklän, ne düşünerim göstermää onnara, kim sayêr, ani biz yaşêêrız tenä görä.

³ Zerä, makar ki biz tencä yaşêêrız, tencä düüşmeeriz.

⁴ Bizim düüşümüzün silähları diil tencä, ama onnarda var Allahtan kuvet, kaleleri yıksınnar deyni.

⁵ Biz yıkêrız boş fikirleri hem hepsini, ani şişkinniklän kalkêr da durgudêr insanı Allahı tanımaktan. Herbir düşünmekleri esir alêrız, ki Hristozu seslesinnär.

⁶ Hazırız cezalamaa herbir seslämezlii, açan sizin seslemeniz taman olacek.

⁷ Bakın önünüzä. Kim inanêr, ani kendisi Hristozun, o düşünsün, nicä o Hristozun, ölä biz dä Hristozunuz.

⁸ Eer bän zeedä üünärseydim bizim kuvetlän, ne Saabi verdi bizä, sizi kaaviletmäk için, ama diil yıkmak için, kalmayacam utanmış.

⁹ Bunu deerim, ki sanmayasınız, ani bän sizi kiyatlarımnan korkudêrım.

¹⁰ Zerä deerlär: «Onun kiyatları keskin hem kaavi, ama kendisi bizdeykän, güüdesi yufka, lafı da kaba».

¹¹ Kim bölä lafeder, ko annasın, ani, ne deeriz sizä kiyatlarımızda, uzakta bulunarkan, hep onu yapacez, aranızda bulunarkan.

¹² Dooru, ani biz kıyışmêêrız benzemää eki konmaa onnarlan, kim kendini meteder. Onnar kendilerini benzederlär hem ölçerlär kendi ölçülerinnän. Aarif olan bölä yapmaz.

¹³ Ama biz zeedesinnän üünmeyecez. Üünmemiz o ölçüdä kalêr, ani Allah verdi bizä, ki, nasaat ederäk, etişelim sizä kadar.

¹⁴ Biz zorlamêêrız kendimizi, sansın sizä etişmedik. Zerä ilkin biz sizä etiştik Hristozun İi Haberinnän.

¹⁵ Biz üünmeeriz ölçüdän dışarı başkaların işlerinnän, ama umutlanêrız, ani sizin inanınız büüdükçä, aranızda işlemäk kırlarımız zeedeliklän genişlenecek,

¹⁶ ölä ki nasaat edäbileriz İi Haberi sizdän taa ötää. Zerä istämeeriz üünelim işlärlän, ani yapıldı başka bir adamın alanında.

¹⁷ «Kim üüner, üünsün Saabiylän».

¹⁸ Zerä diil o, kim kendini meteder, beenilecek, ama kimi Saabi meteder.