1 Tіmofeyä 5 - Enі Baalantı

Baalantılar klisedä

¹ İhtärı sert azarlama, ama nasaat ver ona, nicä bobana. Nasaat ver genç adamnara, nicä kardaşlarına;

² ihtär karılara, nicä anana; genç karılara, nicä kızkardaşlarına, bütün paklıklan.

³ Hatır güt dul karılara, ani hakına kimseysiz.

⁴ Ama eer bir dul karının varsa uşakları eki unukaları, onnar üürensinnär Allahın yolunda gitmää, ilkin kendi aylesinä yardım etsinnär, iilik çevirsinnär ana-bobalarına, zerä bunu Allah beener.

⁵ Dul karı, ani hakına kimseysiz hem yalnız kalmış, umudunu Allaha koyêr hem gecä-gündüz durmamayca Ona yalvarêr hem dua eder.

⁶ Ama dul karı, ani kendini verer sefalık sürmeyä, taa yaşarkan, ölüdür.

⁷ Bu işleri onnara annat, ki maanasız tabeetli olsunnar.

⁸ Eer birkimsey kendi yakınnarı için, maasuz kendi aylesi için zaamet gütmärseydi, o inanı inkär etmiş da taa beterdir, nekadar bir inansız.

⁹ Ki adı dullar listasına yazılsın, dul karı lääzım olsun altmış yaşından yukarı, bir kocaylan evlenmiş,

¹⁰ ii işleri için bilinän, uşak büütmüş, musaafir kabletmiş, Allahın ayoz halkının ayaklarını yıkamış, sıkıntıda olannara yardım etmiş hem çalışkannıklan hertürlü iilik yapmış.

¹¹ Taa genç dulların adlarını listaya yazma. Zerä onnar, tencä istedikleri kaaviledip Hristoza karşı, enidän evlenmää isteerlär.

¹² Ozaman kabaatlı kalêrlar, zerä bozêrlar eminnerini, ani ilkin yaptılar.

¹³ Ondan kaarä, onnar üürenerlär haylak gezmää evdän evä, da diil sade haylak gezmää, ama çeneli olmaa hem başkaların işlerinä karışmaa, söleyeräk, ne düşmeer.

¹⁴ Onuştan isteerim, ki genç dullar evlensinnär, uşak duudursunnar, evlerini kullansınnar da karşı durana kolaylık vermesinnär, ki bizi kötülesin.

¹⁵ Zerä kimisi onnardan şindän sora saptılar da şeytanın ardına gittilär.

¹⁶ Eer bir inancı karının dul yakınnarı varsa, lääzım onnara baksın da zaametä koymasın kliseyi, ki klisä yardım edäbilsin dullara, ani hakına kimseysiz.

¹⁷ Presviterlär, ani ii önderleerlär, lääzım iki katına hatırlansınnar, ayırıca onnar, kim işleer nasaat etmektä hem üüretmektä.

¹⁸ Zerä Ayoz Yazı deer: «Baalama öküzün aazını, harman düüyärkän» hem «İşçiyä yaraşêr kendi ödää».

¹⁹ Kabaatlandırmak presviterä karşı kabletmä, olmayınca iki-üç şaat.

²⁰ Kim ileri dooru günah yapêr, onnarı takazala hepsinin önündä, ki kalanı da korksun.

²¹ Allahın, İisus Hristozun hem seçilmiş angillerin önündä seni eminneerim, ki pay tutmayarak hem kimseyin üzünä bakmayarak bu sımarlamakları tamannayasın.

²² Ellerini kimseyin üstünä tez koyma, pay alma başkaların günahlarında. Kendini pak tut.

²³ İleri dooru içmä salt su, ama iç biraz şarap senin katının hem sık hastalıkların beterinä.

²⁴ Kimi insannarın günahları açık, onnar öncä, daava olmadaan, biliner. Başkaların günahları sora açılêr.

²⁵ Hep ölä ii işlär dä açık, onnar da, ani diil açık, yok nasıl saklı kalsın.