1 Tіmofeyä 3 - Enі Baalantı

Klisenin kullanıcıları

¹ Aslıdır o söz, ani kim özener episkop olsun, havez ii işä.

² Onuştan episkop lääzım olsun maanalanmaz tabeetli, bir karıylan evli, ayık, saa fikirli, esaplı, musaafirci, becerik üüretmää.

³ Olmasın sarfoşçu, düüşçü, /tamah,/ ama yalpak olsun, kavga etmesin, para sevmesin.

⁴ İi kullansın kendi evini, ölä ki uşakları bütün saygıylan ön versinnär.

⁵ Zerä kim kendi evini kullanmaa becermeer, nesoy var nasıl güdäbilsin Allahın klisesini?

⁶ Olmasın inana eni dönmüşlerdän, ki hodullanmasın da diavol gibi kabaatlı kalmasın.

⁷ Lääzım, ki klisedän dışanda olannardan bir ii insan gibi tanınsın, başka türlü onnardan maanalanar hem düşär diavolun kapkanına.

⁸ Hep ölä diakonnar da düşer, saygılı olsunnar, lafını basan olmasınnar, içkicilää verilmesinnär, tamah olmasınnar,

⁹ inanın saklılıını pak üzlän korusunnar.

¹⁰ Bunnar da öncä lääzım denensinnär, sora izmet etsinnär, eer onnarda kusur olmarsa.

¹¹ Hep ölä karılar saygılı olsunnar, fitleyici olmasınnar, ayık olsunnar, inanç herbir iş üzerä.

¹² Diakonnar olsun bir karıylan evli, ii kullansınnar uşaklarını hem kendi evlerini.

¹³ Zerä diakonnar, kim ii izmet eder, kendilerinä ikram edener hem çok kıyışmak edenerlär inannarında İisus Hristoza.

Büük saklılık

¹⁴ Umutlanêrım tezdä geleyim sana. Ama sana bunnarı yazêrım,

¹⁵ ki, eer birtürlü oyalanarsam, sän biläsin, nicä düşer götürmää kendini Allahın evindä, ani var diri Allahın klisesi, aslılıın dirää hem temeli.

¹⁶ Hiç lafsız, Allahın yolunun saklılıı büüktür: Allah tencä gösterildi, Duhlan Kendini dooruladı, angillerä göründü, milletlerdä nasaat edildi, dünnedä inannan kabledildi, metinniklän yukarı alındı.