1 Tіmofeyä 2 - Enі Baalantı

Dua klisedä

¹ Onuştan hepsindän öncä nasaat vererim, dualar, istemeklär, yalvarmaklar hem şükürlär edilsin hepsi insan için,

² padişahlar için hem hepsi üüsek zaabitlär için, ki geçirelim raat hem uslu bir yaşamak, bütün verilmäklän Allaha hem kendinizi dooru götürmäklän.

³ Zerä bu iidir hem yakışıklı bizim Kurtarıcı Allaha,

⁴ Angısı isteer, ki hepsi insan kurtulsun hem etişsin, ki aslılıı tanısın.

⁵ Zerä bir Allah hem bir Aracı Allahın hem insanın arasında, adam İisus Hristos.

⁶ O verdi Kendini kurban, ki kurtarsın hepsi insanı. Uygun zamanda bunun için şaatlık edildi.

⁷ Bunun için bän koyuldum haberci hem apostol. Dooru söleerim, yalandırmêêrım. Koyuldum, ki üüredeyim milletleri inana hem aslılaa.

⁸ Onuştan isteerim, ki hererdä adamnar dua etsinnär, kaldırıp pak ellerini, üfkesiz hem çekişsiz.

⁹ Hep ölä karılar da yakışıklı giinsinnär utanmaklan hem saa fikirlän, diil saçlarını kabardarak örsünnär eki donansınnar altınnan, sedeflän yada paalı rubaylan,

¹⁰ ama donatsınnar kendilerini iilik yapmaklan, nicä yakışêr karılara, angılar deerlär, ani verildilär Allaha.

¹¹ Karı usluluklan, ön vereräk, üürensin.

¹² İzin vermeerim karı üüretsin eki çorbacı olsun kocasına. O uslulukta üürensin;

¹³ zerä ilkin yaradıldı Adam, sora Eva,

¹⁴ hem Adam aldadılmadı, ama karı aldadıldı da günaha düştü.

¹⁵ Ama karı kurtulacek Uşaan duumasınnan, eer saa fikirlän yaşarsa inanda, sevgidä hem ayozlukta.