1 Salonіklіlerä 5 - Enі Baalantı

¹ Kardaşlar, bu oluşlar için yok zorluk yazmaa sizä, ne vakıt hem ne günnerdä olacek,

² zerä kendiniz ii bilersiniz, ani Saabinin günü gelecek, nicä bir hırsız gecä geler.

³ Ozaman, açan deyeceklär «usluluk hem korkusuzluk», ozaman ap-ansızdan bela üstlerinä gelecek, nicä karının duumak sancıları, da kurtulamayaceklar.

⁴ Ama siz, kardaşlar, diilsiniz karannıkta, ki o gün tutsun sizi hırsız gibi.

⁵ Zerä siz hepsiniz aydınnık oolları, gündüz oolları, diiliz ne gecä, ne dä karannık uşakları.

⁶ Onuştan uyumayalım, nicä kalanı, ama ayık hem uyanık olalım.

⁷ Çünkü uyuyannar gecä uyuyêrlar, içkicilär dä gecä sarfoş olêrlar.

⁸ Ama biz gündüz oolları, onuştan lääzım ayık olalım, güüsümüzä inan hem sevgi zirhini giiyelim, başımıza kurtulmak umut başlıını takalım.

⁹ Çünkü Allah bizi üfkesi için ayırmadı, ama kurtulmak edenelim bizim Saabi İisus Hristos adından,

¹⁰ Angısı öldü bizim için, ki biz uyanıkız mı, uyuyêrız mı, yaşayalım Onunnan bilä.

¹¹ Onuştan biri-birinizi üreklendirin hem duhça kaavileyin, nicä dä yapêrsınız.

Bitki nasaatlar hem selämnär

¹² Yalvarêrız sizä, kardaşlar, hatırlayın sizdeki işçileri, ani sizi kullanêrlar Saabinin yolunda hem akıl vererlär.

¹³ Onnara en büük saygı hem sevgi gösterin onnarın işi için. Biri-birinizlän barışmakta yaşayın.

¹⁴ Sizä yalvarêrız, kardaşlar, akıl verin kasavetsizlerä, üreklendirin korkakları, yufkaları arkalayın, hepsinnän saburlu olun.

¹⁵ Bakın, ki kimsey kötülük için kötülük çevirmesin, ama çalışın herzaman iilik yapmaa biri-birinizä hem herkezinä.

¹⁶ Herzaman sevinin.

¹⁷ Dayma dua edin.

¹⁸ Herbir halda şükür edin, zerä ölädir sizin için Allahın istedii İisus Hristozda.

¹⁹ Ayoz Duhu süündürmeyin.

²⁰ Prorokluu paasızlandırmayın.

²¹ Hepsini deneyin, ne ii, ondan tutunun.

²² Yıraklanın hertürlü kötülüktän.

²³ Usluluk verän Allah bütünnä sizi ayozlasın. Sizin duhunuz, canınız hem güüdeniz bütünnä kedersiz korunsun bizim Saabi İisus Hristozun gelmesindä.

²⁴ Sizi çaaran Allah inançtır, O bunnarı yapar.

²⁵ Kardaşlar! Dua edin bizim için.

²⁶ Selämneyin hepsi kardaşları ayoz öpüşlän.

²⁷ Saabinin adınnan sımarlêêrım, okuyun bu kiyadı hepsi /ayoz/ kardaşlara.

²⁸ İivergi olsun sizinnän bizim Saabi İisus Hristozdan. /Amin./