1 Korіnflіlerä 9 - Enі Baalantı

Apostolun payı

¹ Diilim mi bän serbest? Diilim mi apostol? Görmedim mi bän İisusu, bizim Saabiyi? Diilsiniz mi siz – benim izmetimin meyvası Saabidä?

² Eer başkası için diilseydim apostol, sizin için baarlem apostolum. Benim apostolluumun mühürü sizsiniz, çünkü inancıysınız Saabiyä.

³ Butürlü dooru çıkarêrım kendimi onnara karşı, kim beni maanalêêr.

⁴ Yok mu dooruluumuz, iyelim hem içelim?

⁵ Yok mu dooruluumuz, biz birär kızkardaş alalım, ki karımız olsun, nicä yapêr öbür apostollar, Saabinin kardaşları hem Kifa?

⁶ Ne, salt benim hem Varnavanın mı yok dooruluumuz işlämeyelim?

⁷ Kim cengä gider kendi harcınnan? Kim baa koyêr da emişindän imeer? Kim sürüyü otladêr da sürünün südündän içmeer?

⁸ Ne, sade adamcasına mı bunnarı söleerim? Bunu sölämeer mi Ayoz Zakon da?

⁹ Moiseyin zakonunda yazılı: «Baalamayasın öküzün aazını harman düüyärkän». Ne, öküzlär için mi kahırlanêr Allah?

¹⁰ Osa maasuz bizim için mi lafeder? Elbetki, bizim için yazılı. Çünkü kim sürer, sürsün umutlan, hem kim harman düüyer, düüsün umutlan, ki payı da olacek harmandan.

¹¹ Çünkü biz ektik sizdä duhça toomnar, büük iş mi olur, eer sizdän tencä biçärsäk?

¹² Eer başkalarının dooruluu varsaydı, sizdän yardım alsınnar, bizim taa çok dooruluumuz yok mu? Ama biz bu dooruluktan faydalanmadık. Hepsini geçirdik, ki köstek olmayalım Hristozun İi Haberinin nasaat edilmesinä.

¹³ Bilmeersiniz mi, ani ayoz izmetçilik yapan Ayoz binadan doyunêr. Kim izmetçi kurbannıkta, pay alêr ondan, ne var kurbannıkta.

¹⁴ Hep ölä Saabi da sıraladı, kim nasaat eder İi Haberi, İi Haberdän yaşasınnar.

¹⁵ Ama bän bu dooruluklarımdan hiç birisindän bilä faydalanmadım. Bunnarı yazmêêrım, ki benim için bişey yapılsın, zerä bana taa ii öleyim, nekadar birkimsey boşa çıkarsın benim lafımı.

¹⁶ Eer nasaat edärseydim İi Haberi, yok neylän üüneyim, zerä bu benim borcum. Vay bana, eer nasaat etmärseydim!

¹⁷ Eer bunu kendi istediimdän yaparsaydım, baaşış edenärim. Eer zoruna yaparsaydım, yapêrım sade o izmeti, ne bana inandırılmış.

¹⁸ Ozaman ne baaşış bana olur? Bu, ani nasaat ederäk İi Haberi /Hristos için/, nasaat ederim ödeksiz, faydalanmayarak, İi Haberin nasaatçısı olarak, kendi dooruluumdan.

¹⁹ Zerä serbest olarak, kimseyin çıraa diilim, kendimi çırak herkezinä yaptım, ki taa çok insan kazanabileyim.

²⁰ İudeylärlän bän iudey gibi kendimi götürdüm, ki iudeyleri kazanayım. Makar ki kendim Ayoz Zakonun zapında diilim, Zakonun zapında olannarlan sansın Zakonun zapında oldum, ki kazanabileyim Zakondan zaplı olannarı.

²¹ Onnarlan, kimdä Ayoz Zakon yok, oldum sansın bendä dä Zakon yok, ki kazanabileyim onnarı, kimdä Zakon yok, makar ki bän diilim bir adam, kimdä yok Allahın Zakonu, ama Hristozun zakonun zapındayım.

²² Yufkalarlan yufka oldum, ki yufkaları kazanabileyim. Herkezinnän hepsi oldum, ki kurtarabileyim baarlem kimisini.

²³ Hepsini İi Haber için yapêrım, ki benim dä payım olsun İi Haberin iiliklerindän.

²⁴ Bilmeersiniz mi, ani kim yarışmakta yarışêr, hepsi kaçıp-yarışêr, ama salt birisi baaşış kazanêr? Siz ölä kaçın, ki baaşış kazanabiläsiniz!

²⁵ Hepsi, kim yarışêr atletik oyunnarda, tutêrlar kendilerini zaplı herbir üzerä. Onnar bunu yapêrlar, ki bir sörpeşär feneţ kazansınnar. Ama biz yapêrız, ki sörpeşmäz feneţ kazanalım.

²⁶ Onuştan bän kaçmêêrım, nicä birisi, kim bilmeer, nereyi dooru kaçêr. Boşuna yumuruklan düümeerim, nicä birisi, kim lüzgeri düüyer.

²⁷ Ama kendi güüdemi sert kullanêrım da zapta tutêrım. Zerä istämeerim, ki nasaat edip başkasına, sonda kendim bir tarafta kalayım.