1 Korіnflіlerä 7 - Enі Baalantı

Evlenmäk için

¹ Dönelim onnara, neçin yazdınız bana: «İidir, ki adam karıya dokunmasın», – deersiniz.

² Ama, ki orospuluktan korunsunnar, herbir adamın kendi karısı olsun hem herbir karının kendi kocası olsun.

³ Koca kendi borcunu karının önündä yapsın, hep ölä karı da kendi borcunu kocanın önündä yapsın.

⁴ Karı diil çorbacı kendi güüdesinä, ama koca. Hep ölä koca da diil çorbacı kendi güüdesinä, ama karı.

⁵ Biri-birinizdän atılmayın, salt kayıllıklan bir vakıda ayırı kalabilirsiniz, ki veriläsiniz duaya; ama sora enidän birleşin, ki zapsızlık beterinä şeytan denämesin sizi.

⁶ Bunu sizä vermeerim bir sımarlamak gibi, ama bir nasaat gibi.

⁷ Bän isteerim, ki hepsi insan benim gibi olsun, ama herkezin Allahtan var kendi baaşışı. Birisinä bir türlü, başkasına başka türlü verili.

⁸ O evlenmemişlerä hem dullara deerim, ani ii olur, ki benim gibi kalsınnar.

⁹ Ama zaplayamarsaydılar kendilerini, ko evlensinnär. Zerä taa ii, ki evlensinnär, nekadar sevdaylan yansınnar.

¹⁰ Evlilerä deerim diil bän, ama Saabi: karı ayırılmasın kocasından.

¹¹ Eer ayırıldısaydı, dursun evlenmedik, yada kendi kocasınnan barışsın. Koca da brakmasın kendi karısını.

İnancı hem inansız karı-koca

¹² Öbürlerinä deerim bän, ama diil Saabi. Eer bir kardaşın karısı inansızsaydı, ama kayılsaydı onunnan yaşamaa, ayırılmasın karısından.

¹³ Eer karının kocası inansızsaydı, ama istärseydi onunnan yaşamaa, ayırılmasın kocasından.

¹⁴ Zerä o inansız koca ayozlanêr inancı karıdan, hem inansız karı ayozlanêr inancı kocadan. Başka türlü uşaklarınız pak olmayaceydılar, ama şindi onnar ayoz.

¹⁵ Eer inansız taraf istärseydi ayırılmaa, ko ayırılsın. Bu halda kardaş yada kızkardaş diil baalı. Allah çaardı bizi yaşayalım uslulukta.

¹⁶ Zerä neredän biläsin sän, karı, kurtarmayacan mı kocanı? Osa, koca, neredän bilersin, kurtarmayacan mı karını?

Herkez kendi erindä

¹⁷ Herkez yaşasın ölä, nicä Allah ona payetti, hem nicä Saabi onu çaardı. Bu sırayı erleştirdim hepsi kliselerdä.

¹⁸ Eer birkimsey kesikliykän çaarıldısaydı, o kesikli kalsın. Eer birkimsey kesiksizkän çaarıldısaydı, o yapmasın kesiklik.

¹⁹ Kesiklik bişey diil, kesiksizlik dä bişey diildir. Aslı ne lääzım – tamannamaa Allahın sımarladıklarını.

²⁰ Herkez ne halda çaarıldı, o halda da kalsın.

²¹ Çırak mıydın, açan çaarıldın? Kahırlanma, ama eer boşanabilirseydin, taa ii olur, ki faydalanasın bu kolaylıktan.

²² Kim çıraktı, açan Saabidän çaarıldı, o Saabidä serbest. Hep ölä kim serbestkän çaarıldı, o Hristozda çırak.

²³ Siz satın alındınız bir büük paaylan. Onuştan olmayın çırak insannara.

²⁴ Kardaşlar, herkez kalsın o halda Allahın önündä, ne halda çaarıldı.

Evlenmemişlär için

²⁵ Kızlar için bendä Saabidän yok emir. Ama bän bir nasaat vererim, çünkü edendim Saabidän acıyannık, ki inanç olayım.

²⁶ Ölä sanêrım, ki şindiki sıkıntılara görä, ii olur, ki herbiri kalsın nicä bulunêr.

²⁷ Baalıysın mı karıylan? Ondan boşanmaa bakma. Boşandın mı karıdan? Aarama başka karı.

²⁸ Ama eer evlenärseydin, günah yapmêêrsın. Kız da, eer evlenärseydi, günah yapmêêr. Salt ki onnarın bu yaşamakta sıkıntıları olacek, da bän isteerim sizi bundan kurtarayım.

²⁹ Kardaşlar, tä ne isteerim sölemää: vakıt kısaldı. Şindän sora kimin var karısı, olsun nicä dä yok.

³⁰ Kim aalêêr, olsun aalamayannar gibi. Kim seviner, olsun sevinmeyennär gibi. Kim satın alêr, olsun onnar gibi, kimdä yok.

³¹ Kim faydalanêr bu dünneyin iiliklerindän, olsun, nicä onnar, kim faydalanmêêr, zerä dünneyin şindiki halı geçär.

³² Ama bän isteerim, ki siz olasınız kahırsız. Kim evlenmedi, kahırlanêr Saabinin işleri için. Bakêr, kendini Allaha beendirsin.

³³ Ama evli kahırlanêr dünnä işleri için. Bakêr, kendini karısına beendirsin.

³⁴ Hep ölä ayırıklık var evli karının hem kızın arasında. Kız kahırlanêr Saabinin işleri için. Bakêr, nicä güüdesinnän hem duhunnan ayozlansın. Ama evli karı kahırlanêr dünnä işleri için. Bakêr, kendini kocasına beendirsin.

³⁵ Söleerim bunu sizin iiliiniz için, diil ki sizi sıkılayım, ama ki siz yakışıklı yaşayasınız hem herzaman bütün fikirinizlän Saabiyä izmet edäsiniz.

³⁶ Eer birkimsey sayarsaydı, ani diil yakışıklı, ki kızı gençliini geçirsin, lääzımsa evlensin, o yapsın nicä isteer, kızını eversin.

³⁷ Ama kimin yoksa zoru eversin kızını, kim kendi üreendä kaaviysä, da varsa nasıl yapsın istediinä görä hem üreendä kararladıysa, ki evermesin kızını, o ii yapêr.

³⁸ Ölä ki, kim everer kızını, ii yapêr, ama kim evermeer, taa ii yapêr.

³⁹ Evli karı baalı zakonnan kocasına okadar vakıt, nekadar yaşêêr kocası. Ama eer kocası ölärseydi, ozaman karı serbest, var nicä evlensin, kimä isteer, ama salt ona, kim Saabinindir.

⁴⁰ Ama benim düşünmemä görä, karı olur taa mutlu, eer evlenmedik kalarsaydı. Sanêrım, ani bendä dä var Allahın Duhu.