1 Korіnflіlerä 6 - Enі Baalantı

Hristiannarda daavalar

¹ Nasıl kıyışêr sizdän birisi başkasına daava açmaa, da daava kesmää gider inansızlara, ama gitmeer Allahın ayoz halkına?

² Bilmeersiniz mi, ani Allahın ayoz halkı daava kesecek bu dünneyä? Eer dünneyä daava kesärseydiniz, küçük işlerdä daava kesämärsiniz mi?

³ Bilmeersiniz mi, ani biz daava kesecez angillerä? Nekadar taa çok daava kesäbiliriz bu zamanın işlerindä!

⁴ Açan var bir daavanız bu yaşamaktakı işlär için, siz daavacı koyêrsınız onnarı, kim klisedä bişey diil.

⁵ Bunnarı söleerim sizin utanmanız için. Ne, sizin aranızda bir dä aarif adam yok mu, ki çözdürsün kardaşlar arasında daavaları?

⁶ Kardaş kardaşınnan daavaya çıkêr, da bunu inansızların önündä yapêr!

⁷ Siz biri-birinizi daavaya verärseniz, bu – sizin için bir aşaalanmaktır. Taa ii diil mi, zarara dayanasınız? Taa ii diil mi, kaybedäsiniz?

⁸ Ama siz kendiniz zarar yapêrsınız hem kendi kardaşlarınızı da soyêrsınız.

⁹ Bilmeersiniz mi, ani o dooru olmayannar Gök Padişahlıını miras etmeyeceklär. Aldanmayın, hayırsızlık yapannar, idollara baş iildennär, orospuluk yapannar, gomoseksualistlär,

¹⁰ hırsızlar, tamahlar, içkicilär, amazçılar, soyguncular Gök Padişahlıını miras etmezlär.

¹¹ Butürlüydü kiminiz sizdän, ama yıkandınız, ayozlandınız, aklandınız Saabi İisus Hristozun adınnan hem bizim Allahın Duhunnan.

Orospuluktan korunun

¹² «Hepsini düşer yapayım», – deersiniz, salt diil hepsi faydalı. «Hepsini düşer yapayım», – deersiniz, ama bişey brakmam beni zaplasın.

¹³ «İmäk şkembä için, şkembä dä imäk için», – deersiniz. Ama Allah telef edecek ikisini dä. Güüdä diil orospuluk için, ama Saabi için, Saabi dä güüdä için.

¹⁴ Allah, Kim diriltti Saabiyi, dirildecek bizi dä Kendi kuvedinnän.

¹⁵ Bilmeersiniz mi, ani sizin güüdeleriniz – Hristozun ekleri? Ne, Hristozun eklerini alıp, yapayım onnarı orospuluk ekleri mi? Olmaz!

¹⁶ Ne, bilmeersiniz mi? Kim birleşer orospuylan, bir güüdä olêr onunnan. Nicä dä sölener: «Onnar ikisi bir güüdä olêrlar».

¹⁷ Ama kim birleşer Saabiylän, Onunnan bir duh olêr.

¹⁸ Korunun orospuluktan. Kalan günahlar, ani insannar yapêr, güüdedän dışarı, ama orospu kendi güüdesinä karşı günah yapêr.

¹⁹ Ne, bilmeersiniz mi, ani güüdeniz – Duhun ayoz binası, neredä Ayoz Duh bulunêr, hem Onu Allahtan kablettiniz? Siz kendi-kendinizin diilsiniz.

²⁰ Zerä siz satın alınmışsınız bir büük paaylan. Onuştan metinneyin Allahı sizin güüdenizlän /hem duhunuzlan, ani Allahtan kablettiniz/.