1 Korіnflіlerä 5 - Enі Baalantı

Orospuluk yapan kardaş

¹ Aslısını söleerlär, ani aranızda orospuluk varmış, hem ölä bir orospuluk, ani tayfännarda da olmêêr. Orayı kadar etişti, ani sizdän birisi yaşêêr kendi bobasının karısınnan.

² Siz dä bununnan şişkinnenersiniz! Taa ii olaceydı, ki aalayasınız. O, kim bu işi yaptı, düşer uuradılsın aranızdan, ölä diil mi?

³ Makar ki bulunmêêrım güüdeylän aranızda, ama olup duhlan, kararladım, sansın aranızda bulunêrım, ani kim yaptı bunu,

⁴ toplanmakta, İisusun adına, hem benim duhum da olsun sizinnän, Saabimiz İisusun kuvedinnän,

⁵ verin onu şeytanın elinä, ki teni telef olsun, ama duhu kurtulsun Saabi İisusun gelmesindä.

Hristos – Paskellä kuzusu

⁶ Üünmeniz diil ii. Bilmeersiniz mi, ani az maya bütün hamuru kabardêr?

⁷ Paklanın eski mayadan, ki olasınız bir eni hamur, nicä dä mayasızsınız. Zerä Hristos, bizim Paskellä kuzumuz, kurban oldu.

⁸ Geçirelim yortuyu diil eski hamurlan hem diil kin hem kötülük mayasınnan, ama halizliin hem aslılıın mayasız ekmäännän.

⁹ Sizä yazdım benim kiyadımda, kafadar olmayasınız orospuluk yapannarlan.

¹⁰ Doorusunu, ne demäk istärdim, diil, ki kafadar olmayasınız bu dünneyin adamnarınnan, kim orospuluk yapar, tamahlık edär, soygunculuk edär yada idollara baş iildär. Zerä ozaman lääzım çıkasınız bu dünnedän!

¹¹ Ama yazdım, kafadar olmayasınız birisinnän, kim kendini «kardaş» sayêr, ama kendi bir orospu, tamah, idollara baş iildän, amazçı, içkici yada bir hırsız. Butürlü adamnarlan düşmeer sofraya da oturasınız.

¹² Hakına, ne işim benim, maanalayım dışankıları? Düşmeer mi, daava kesäsiniz klisedä olannara?

¹³ O dışankı olannarı Allah daava edecek. «Aranızdan uuradın bu kötü adamı».