1 Korіnflіlerä 16 - Enі Baalantı

Kardaşlara yardım

¹ Dönelim yardıma, ne toplanacek Allahın ayoz insanı için. Siz yapın ölä, nicä sıraladım Galatiya kliselerindä.

² Herkeziniz haftanın ilk günü koysun bir tarafa kendi gelirindän, nekadar kolaylıı var, da korusun, ki bän geldiynän, olmasın yardım toplanması.

³ Açan gelecäm, kimi seçeceniz, onnarı kiyatlarlan yollayacam, götürsünnär sizin baaşışlarınızı İerusalimä.

⁴ Eer uygun olursa, ki bän dä gideyim, ozaman benimnän gelirlär.

Pavlinin maasuz istedikleri

⁵ Sizä gelecäm, açan Makedoniyadan geçecäm, zerä bän geçerim Makedoniyadan.

⁶ Beki sizdä bir vakıt kalacam, beki dä kışlayacam, eer siz beni geçirärseniz, nereyi gidecäm.

⁷ Zerä bän istämeerim görüşeyim sizinnän salt geçeräk, ama umutlanêrım sizdä kalayım bir parça vakıt, eer Saabi izin verirsä.

⁸ Efes kasabasında duracam Ellinci günü yortusunadan,

⁹ zerä bana açıldı bir geniş kapu büük işlär için, ama karşı durannar da çok.

¹⁰ Eer gelärseydi sizä Timofey, bakın, o korkusuz olsun aranızda. Zerä o yapêr Saabinin işini, nicä dä bän.

¹¹ Onuştan kimsey onu paasızlandırmasın, ama geçirin onu usluluklan, ki gelsin bana, zerä bän bekleerim onu kardaşlarlan.

¹² Kardaş Apollosa çok yalvardım, ki gitsin kardaşlarlan sizä, ama o hiç istämedi şindi gitsin. O gidecek, nezaman vakıdı uyacek.

¹³ Kuşku olun, inanda kaavi durun, girgin hem kuvetli olun.

¹⁴ Hepsini sevgiylän yapın.

¹⁵ Yalvarêrım sizä, kardaşlar, – siz bilersiniz Stefanın evdekilerini, onnar Ahayada ilk inancılar da verildilär, ki Allahın ayoz halkına izmet etsinnär –

¹⁶ butürlü insannarı sesleyin hem hepsini, kim onnarlan işleer hem çalışêr.

¹⁷ Bän sevindim, açan Stefan, Fortunat hem Ahaik geldilär. Onnar bana unutturdular sizinnän olmamazlıımı,

¹⁸ zerä onnar beni dä, sizi dä duhça serinnettilär. Onuştan busoy insannarı paaya koyun.

¹⁹ Selämneerlär sizi Asiya dolayında kliselär. Sizä çok seläm yollêêrlar Akila hem Priskilla kliseylän bilä, ani onnarın evindä.

²⁰ Hepsi kardaşlar seläm sizä yollêêrlar. Selämneyin biri-birinizi ayoz öpüşlän.

²¹ Bän, Pavli, bu selämneri yazêrım kendi elimnän.

²² Eer birkimsey sevmärseydi Saabi İisus Hristozu, olsun betvalı. Marana fa!

²³ Saabi İisusun iivergisi olsun sizinnän.

²⁴ Benim sevgiliim İisus Hristozda sizinnän hepsinizlän. /Amin./