1 Korіnflіlerä 15 - Enі Baalantı

Hristos dirildi

¹ Kardaşlar, isteerim aklınıza getireyim İi Haberi, angısını nasaat ettim sizä, angısını siz kablettiniz hem angısına baalı kaldınız.

² İi Haberlän kurtulêrsınız, eer sıkı tutunarsaydınız ondan, ne sizä nasaat ettim. Başka türlü naafilä inandınız.

³ Sizi üürettim o en büük işleri, ne kendim dä kablettim, ani Hristos öldü bizim günahlar için, nicä yazılı Ayoz Yazılarda.

⁴ O gömüldüktän sora üçüncü günü dirildi, nicä yazılı Ayoz Yazılarda.

⁵ İlkin Kifaya gösterildi, sora onikisinä dä.

⁶ Ondan sora gösterildi bir zamanda beşüz kardaştan zeedesinä. Onnardan çoyu taa yaşêêr, ama bir boyu geçindi.

⁷ Sora gösterildi İakova hem hepsi apostollara.

⁸ Hepsindän sora gösterildi bana da, nicä bir vakıtsız duulmuşa.

⁹ Zerä bän en küçüküm apostollardan, kim hiç etmeer sayılsın apostol, zerä kooladım Allahın klisesini.

¹⁰ Ama şindi neysäm, Allahın iivergisinnän öleyim. Onun iivergisi benim için naafilä olmadı. Bän işledim taa çok hepsi apostollardan – doorusu, diil bän, ama Allahın iivergisi, ani benimnän işleer.

¹¹ Ölä ki, bän mi, onnar mı, biz bölä nasaat ederiz, siz dä ölä inandınız.

Ölülerin dirilmesi

¹² Çünkü nasaat ediler, ani Hristos dirildi ölüdän, ozaman ne için sizin aranızdan kimisi deer, ani ölülär dirilmeyecek?

¹³ Eer ölülär dirilmärseydilär, Hristos da dirilmedi.

¹⁴ Eer dirilmediseydi Hristos, ozaman bizim nasaat naafilä, inanınız da boşuna.

¹⁵ Çıkêr, ki biz Allahın yalancı şaatlarıyız, zerä şaatlık ettik, ani Allah diriltti Hristozu. Ama çıkêr, ani Onu diriltmedi, eer ölülär hakına dirilmärseydilär.

¹⁶ Zerä, eer ölülär dirilmärseydilär, ozaman Hristos da yoktu nasıl dirilsin.

¹⁷ Eer Hristos dirilmediseydi, sizin inan naafilä, siz kalêrsınız günahlarınızlan.

¹⁸ Çıkêr, ani kim geçindi, inanarak Hristoza, onnar kaybeldilär.

¹⁹ Eer salt bu ömürdä umutlanarsaydık Hristoza, ozaman biz hepsindän en kısmetsiz.

²⁰ Ama doorusu, Hristos ölüdän dirildi, ölennerdän ilk.

²¹ Çünkü ölüm geldi bir adamnan, hep ölä bir adamnan ölüdän dirilmäk geldi.

²² Nicä hepsi Adamda öler, ölä dä hepsi Hristozda ömür bulacek.

²³ Salt ki herkezi sırasınca dirilecek. İlkinki Hristos, sora onnar, kim Hristozun, Onun gelmesindä.

²⁴ Sora zamanın bitkisi olacek, nezaman Hristos Padişahlıı Allah Bobanın elinä verecek, nezaman yok edecek hertürlü çorbacılıı, hertürlü zaabitlii hem kuvedi.

²⁵ Zerä O lääzım padişahlık etsin, ki bitkidä Allah koysun hepsi duşmannarını Onun ayakları altına.

²⁶ En bitkinci duşman, ani yok edilecek, – ölümdür.

²⁷ Dooru, ani Allah «koydu hepsini Onun ayakları altına». Ama açan dener «hepsini koydu», belli, ki Allahtan kaarä, Kim hepsini verdi Onun zaplıına.

²⁸ Açan hepsi verildi Onun zaplıına, ozaman Kendi Ool da verilecek Allahın zaplıına, Kim öncä verdiydi hepsini Onun zaplıına, ki Allah olsun hepsindän en üstün.

²⁹ Başka türlü, eer ölülär dirilmäzseydilär, ne yapacek onnar, kim vaatiz olêr ölülär için? Ozaman neçin vaatiz olmaa ölülär için?

³⁰ Neçin dayma titsiliktä bulunalım?

³¹ Kardaşlar, bän her gün ölerim. Bunu deerim, çünkü üünerim sizin için Saabimiz İisus Hristozda.

³² Eer bän insan düşünmelerinä görä düüştümsä canavarlarlan Efes kasabasında, ozaman bana ne fayda? Eer ölülär dirilmärsä, ozaman «iyelim hem içelim, zerä yaarına ölecez».

³³ Aldanmayınız, «kötü kafadarlık bozêr ii karakteri».

³⁴ Nicä düşer, gelin kendinizä, günaha girmeyin. Zerä kimisi sizdän Allahı tanımêêr. Bunu söleerim, ki utandırayım sizi.

Nesoy güüdeylän dirilecez

³⁵ Beki birkimsey soracek: «Ölülär nesoy diriler? Dünneyä nesoy güüdeylän döneceklär?»

³⁶ Sän, fikirsiz! Ne ekersin, eer öncä ölmäzseydi, yaşamaya gelmäz.

³⁷ Açan ekersin, ekmeersin güüdeyi, ne sora çıkacek, ama sözgelişi bir toom, bir booday toomu yada bir başka toom.

³⁸ Sora Allah bu tooma güüdä verer, nicä isteer, – herbir tooma kendi güüdesini.

³⁹ Herbir ten diildir birtürlü. İnsan teni bir, hayvan teni başka, kuş teni dä taa başka, balık teni dä başka.

⁴⁰ Hep ölä, var gökteki güüdelär, hem var erdeki güüdelär dä. Ama göktekilerin yalabıklıı başka, erdekilerin dä başka.

⁴¹ Günün yalabıklıı bir türlü, ayın yalabıklıı başka türlü, yıldızların yalabıklıı taa da başka türlü. Yıldızların yalabıklıkları ayırı-ayırı.

⁴² Hep ölä ölülerin dirilmesi olacek. Güüdä, gömülüp, çürüyer, ama, dirilip, çürüksüz olacek.

⁴³ Gömülän güüdä saygısızdır, dirilän güüdä metinni olacek; gömülän yufkadır, dirilän kuvetli olacek.

⁴⁴ Gömüler bir ten güüdä, diriler duhça güüdä. Nicä var ten güüdä, ölä var duhça güüdä dä.

⁴⁵ Nicä yazılı: «İlk Adam bir yaşayan can oldu». Son Adam sa ömür verän bir duh oldu.

⁴⁶ İlkinkisi diil duhça, ama ten. Duhça olan sora geler.

⁴⁷ İlk insan erdän, topraktan oldu. İkinci insan – /Saabi/ göktän.

⁴⁸ Nasıl topraktan insan, ölä topraktan olannar da. Nasıl gökteki İnsan, ölä göktä olannar da.

⁴⁹ Nicä benzeeriz topraktan insana, hep ölä benzeyecez gökteki İnsana da.

⁵⁰ Ne isteerim sölemää, kardaşlar, ani ten hem kan yok nasıl mirasçı olsun Allahın Padişahlıında. Yok nasıl çürüyän güüdä mirasçılık alsın çürüksüzlää.

⁵¹ Söleerim sizä bir saklı iş. Hepsimiz ölmeyecez, ama hepsimiz diişecez

⁵² birdän, bir göz kıpımında, açan sonda truba baardılacek. Zerä truba baardılacek, ölülär dirilecek, ki ölmesinnär, biz dä diişecez.

⁵³ Zerä bu çürüyän güüdä lääzım kaplansın çürüksüzlüklän, hem bu ölümnü güüdä donansın ölümsüzlüklän.

⁵⁴ Açan bu çürüyän güüdä kaplanacek çürüksüzlüklän, hem bu ölümnü güüdä donanacek ölümsüzlüklän, ozaman tamannanacek, ne yazılı: «Ölüm ensenmiş oldu da yok edildi».

⁵⁵ Ölüm, neredä senin ensemän? Neredä senin zihirli iinän?

⁵⁶ Ölümün zihirli iinesi – günahtır, ama günah alêr kuvedini Ayoz Zakondan.

⁵⁷ Şükür Allaha, ani verer bizä ensemäk bizim Saabi İisus Hristozun aracılıınnan!

⁵⁸ Onuştan, sevgili kardaşlarım, olun kaavi, sendellämeyin, herzaman çalışın Saabinin işindä, zerä bilersiniz, ani sizin çalışmanız Saabidä naafilä olmayacek.