1 Korіnflіlerä 13 - Enі Baalantı

Sevgi

¹ Eer lafedärseydim insan dilindä yada angil dilindä, ama sevgim yoksaydı, bir ötär bakırım eki bir uuldar kimvalım.

² Eer bendä varsaydı prorokluk beceriklii, eer bilirseydim hepsi saklı işleri hem edendiseydim bütün bilgiçlii, eer varsaydı büük inanım, bayırları da erindän diiştireyim, ama yoksaydı sevgim, ozaman bän bişey diilim.

³ Eer bütün varlıımı baaşlarsaydım, ki doyurayım fukaaraları, eer güüdemi ateşä verirseydim, ama sevgim yoksaydı, bana bundan hiç bir fayda olmaz.

⁴ Sevgi çok dayanar, iilik yapar, sevgi kıskanmar, üünmär, kabarmar.

⁵ Sevgi kötü kendini götürmär, aaramar fayda kendisinä, tez üfkelenmär, küsü tutmar,

⁶ kötülää sevinmär, ama aslılaa sevinir.

⁷ Sevgi hepsini örter, hepsini inanêr, hepsinä umut eder, hepsinä dayanêr.

⁸ Sevgi hiç durgunmar. Prorokluk sona gelecek, dillär susacek, bilgiçlik kaybelecek,

⁹ zerä bizim bilgiçlik kederli, bizim prorokluk diil taman.

¹⁰ Ama açan tamannık gelecek, ozaman hepsi, ne kederli, yok olacek.

¹¹ Uşakkan, bän uşakçasına lafedärdim, uşakçasına düşünärdim. Ama olgunnandıynan, uşak işlerindän brakıldım.

¹² Şindi hepsini, nicä bir dumannı şişedän göreriz, ama ozaman görüşecez üz-be-üz. Şindi benim bilgiçliim kederli, ama ozaman Allahı tanıyacam ölä, nicä bän tanınmışım.

¹³ Şindi kalêr bunnar üçü: inan, umut hem sevgi, ama sevgi onnardan taa büük.